सुरक्षित आप्रवासन (सामी) कार्यक्रमद्वारा प्रहरीसंग अभिमुखीकरण

समाचार

गृहपृष्ठ
समाचार
सुरक्षित आप्रवासन (सामी) कार्यक्रमद्वारा प्रहरीसंग अभिमुखीकरण

सुरक्षित आप्रवासन (सामी) कार्यक्रमद्वारा प्रहरीसंग अभिमुखीकरण

शुक्रबार, चैत ३, २०७९ बागेश्वरी पोस्ट

नेपालगञ्ज । बैदेशिक रोजगारीमा रहेका कामदार र कामदारका परिवारको उचित संरक्षण गर्ने उद्देश्यले सञ्चालित सुरक्षित आप्रवासन (सामी) कार्यक्रमले आज नेपालगञ्जमा प्रहरीसंग अभिमुखीकरण गरेको छ ।

बैदेशिक रोजगारी सम्बन्धि समस्या, ठगी र उजुरीका विषयमा अन्तरक्रिया गरिएको अभिमुखीकरणमा बाँकेका प्रमुख जिल्ला अधिकारी विपिन आचार्य, प्रहरी प्रमुख सन्तोषसिंह राठौर, नेपालगञ्ज उपमहानगरपालिकाका नगर प्रमुख प्रशान्त विष्ट, प्रमुख प्रशासकीय अधिकृत शिवप्रसाद रिजाल लगायत तीन दर्जन बढी प्रहरीहरुको सहभागिता थियो । बाँकेमा नेपालगञ्ज उपमहानगरपालिका, कोहलपुर नगरपालिका, खजुरा गाउँपालिका र बैजनाथ गाउँपालिकामा सामी कार्यक्रम सञ्चालित छ ।

अभिमुखीकरणमा बैदेशिक रोजगार बोर्डकी बाँके र कैलाली कार्यक्रम अधिकृत लक्ष्मी चौधरीले सामी कार्यक्रमको उपलब्धि, समस्या र समाधानका प्रयासबारे जानकारी गराएकी थिइन् । त्यसक्रममा बाँकेका प्रमुख जिल्ला अधिकारी आचार्यले वैदेशिक रोजगारी सम्बन्धि थुप्रै समस्या रहेको बताउँदै बाँकेबाट खाडी मुलुक जाने मानिसहरुको संख्या तुलनात्मकरुपमा कम भएकाले उजुरी पनि कम आउने गरेको बताए । उनले ठगी सम्बन्धि समस्यामा छलफल गराउने, पैसा दिलाउने, मिलापत्र गराउने काम गरिरहेको जानकारी गराउँदै समाधान हुन नसकेका विषय बैदेशिक रोजगार विभागमा पठाइने बताए । प्रहरी प्रमुख प्रहरी उपरीक्षक राठौरले बैदेशिक रोजगारीसंग सम्बन्धि समस्या र उजुरीहरुलाई प्राथमिकताका साथ हेरिरहेको बताए । बैदेशिक रोजागारीलाई शोषणरहित बनाउन नेपाल प्रहरीको भूमिकाका विषयमा उनले प्रस्तुतिकरण समेत गरेका थिए ।

No description available.

कार्यक्रमको समापन गर्दै नेपालगञ्ज उपमहानगरपालिकाका प्रमुख विष्टले यो कार्यक्रमले बैदेशिक रोजगारीमा रहेकाहरुलाई जोखिमबाट बचाउन सहयोग पुग्ने विश्वास व्यक्त गरे । विष्टले बैदेशिक रोजगारीमा जानेहरु कुनै पनि बहानामा ठगिन नहुने बताए । उनले विदेश जानै पर्दा सीप सिकेर मात्र जान आग्रह गर्दैै अन्यथा दुःख व्यहार्ने अवस्था सिर्जना हुने बताए । प्रमुख प्रशासकीय अधिकृत रिजालले बैदेशिक रोजगारीलाई सुरक्षित र मर्यादित बनाउन सबैको भूमिका आवश्यक हुने बताए । कार्यक्रमको सहजीकरण सामाजिक विकास अधिकृत कृष्णप्रसाद जोशीले थिए ।

No description available.

बैदेशिक रोजगारीमा रहेका कामदार र कामदारका परिवारको उचित संरक्षण गर्ने, गन्तब्य मुलुकमा सुरक्षित र सम्मानजनक रुपमा काम गर्न सक्ने गरी कामदारलाई सूचना, सीप, परामर्श लगायतका सहयोग प्रदान गर्ने, बैदेशिक रोजगारीमा सम्बद्ध निकायहरुको क्षमता अभिबृद्धि गरी बैदेशिक रोजगारलाई थप उपलब्धिमूलक बनाउने उद्देश्यका साथ मुलुकभरका १५६ स्थानीय तहमा सामी कार्यक्रम सञ्चालित छ ।

सामी कार्यक्रम नेपाल सरकार र स्वीस सरकारको द्विपक्षीय सम्झौता अन्तर्गत सञ्चालनमा छ । यो कार्यक्रम श्रम, रोजगार तथा सामाजिक सुरक्षा मन्त्रालय र स्थानीय सरकारको नेतृत्वमा कार्यान्वयन भइरहेको छ । कार्यक्रमलाई स्वीस सरकार विकास सहयोगको तर्फबाट हेल्भेटास नेपालले प्राविधिक सहयोग उपलब्ध गराइरहेको सामी कार्यक्रमका बाँके संयोजक कमलसिंह नेपालीले जानकारी दिए ।

No description available.