चैत १२ गते भित्रै स्ववियु निर्वाचन सम्पन्न गर्न निर्देशन

राजनीति

गृहपृष्ठ
राजनीति
चैत १२ गते भित्रै स्ववियु निर्वाचन सम्पन्न गर्न निर्देशन

चैत १२ गते भित्रै स्ववियु निर्वाचन सम्पन्न गर्न निर्देशन

सोमबार, चैत ६, २०७९ बागेश्वरी पोस्ट

नेपालगन्ज । त्रिभुवन विश्वविद्यालयले स्थगन भएका क्याम्पसमा यही चैत १२ गतेभित्र स्वतन्त्र विद्यार्थी युनियन (स्ववियु ) निर्वाचन गर्न निर्देशन दिएको छ ।

त्रिविका उपकुलपति प्रा. डा. धर्मकान्त बास्कोटाले चैत १२ गतेदेखि परीक्षा सञ्चालन हुने भएकाले सो भन्दा अगाडि नै रोकिएका क्याम्पममा स्ववियु निर्वाचन गर्न निर्देशन दिएका हुन् । उनले रोकिएका क्याम्पसमा आपसी सहमति गरी निर्वाचन प्रक्रिया अगाडि बढाउन आग्रह गरेका छन् ।

स्थगन भएका क्याम्पस-कलेजमा पनि आगामी चैत १२ गतेदेखि सञ्चालन हुन गइरहेको परीक्षालाई मध्यनजर गरी सो अगावै आपसी समझदारी कायम गर्दै कसैको हारजित नसम्झी विद्यार्थी युनियनको जितलाई केन्द्रबिन्दुमा राखी स्थगन भएका निर्वाचन प्रक्रियालाई सम्पन्न गर्न सबै क्याम्पस, राजनीतिक दल, विद्यार्थी सङ्गठन, स्थानीय प्रशासनलाई उपकुलपति डा. बास्कोटाले आग्रह गरेका छन् ।

उनले केही क्याम्पसमा विद्यार्थी सङ्गठनको सामान्य विवादका कारणले मतदान स्थगन गर्नुपरेता पनि अधिकांश क्याम्पसमा शान्तिपूर्णरुपमा सम्पन्न भएको बताएका छन् ।

हिजो चैत ५ गतेदेशभरि नै त्रिविका आङ्गिक र सम्बन्धन प्राप्त क्याम्पसमा १४ वर्षपछि भएको स्ववियु निर्वाचन भएको थियो । ६२ आङ्गिक क्याम्पसमध्ये १३ क्याम्पसमा निर्वाचन प्रक्रिया रोकिएको छ ।

प्रकाशित मिति: सोमबार, चैत ६, २०७९ १२:०४