कांग्रेसको अर्थसहित ८ मन्त्रालयमा दाबी

राजनीति

गृहपृष्ठ
राजनीति
कांग्रेसको अर्थसहित ८ मन्त्रालयमा दाबी

कांग्रेसको अर्थसहित ८ मन्त्रालयमा दाबी

आइतबार, चैत १२, २०७९ बागेश्वरी पोस्ट

नेपाल्गन्ज । नेपाली कांग्रेसले सरकारमा सहभागी हुँदा अर्थ मन्त्रालयसहित कम्तीमा ८ मन्त्रालयमा दाबी गर्ने भएको छ ।

प्रधानमन्त्री पुष्पकमल दाहाल प्रचण्डसँग छलफलमा र गठबन्धन बैठकमा अहिलेसम्म भएका छलफलबारे शनिबार पदाधिकारी बैठकमा ब्रिफिङ भएको थियो । जसमा अर्थसहित ८ मन्त्रालयमा दाबी रहेको पदाधिकारीलाई जानकारी दिइएको थियो ।

सभापति शेरबहादुर देउवाले अहिलेसम्म भएका छलफलका प्रगतिबारे ब्रिफिङ गर्न उपसभापति पूर्णबहादुर खड्कालाई भनेका थिए । खड्काले कम्तीमा ८ मन्त्रालयमा आफूहरूको दाबी रहँदै आएको बताएका थिए ।

‘अर्थ मन्त्रालयसहित कम्तीमा ८ मन्त्रालय कांग्रेसलाई चाहिन्छ, हामी संसदको सबैभन्दा ठूलो पार्टी हो भनेर भनेका छौं,’ पदाधिकारी बैठकमा भएको कुराकानीबारे एक नेताले भने, ‘८ मन्त्रालयको अडानसहित गठबन्धन बैठकमा छलफल गर्ने कुरा भएको छ ।’

प्रधानमन्त्री दाहालले ११ दल मिलाउनुपर्ने भन्दै कांग्रेसलाई ७ मन्त्रालय लिएर सहयोग गरिदिन आग्रह गरिरहेको ब्रिफिङ समेत कांग्रेस बैठकमा भएको थियो । कांग्रेसले उपसभापति पूर्णबहादुर खड्कासहितलाई सरकारमा पठाउने तयारी समेत गरेको छ ।

खड्कालाई उपप्रधानमन्त्रीसहित अर्थ वा रक्षा मन्त्रीको जिम्मेवारी रहने गरी सरकारमा पठाउने तयारी रहेको ती पदाधिकारीले बताए । खड्काले आफू मन्त्री नबन्ने सार्वजनिक रूपमा बताउँदै आएका छन् ।

उपसभापति खड्का मन्त्री बन्न नचाहेमा पूर्व महामन्त्री प्रकाशमान सिंहलाई उपप्रधानमन्त्रीसहित कुनै मन्त्रालय लिने गरी सरकारमा पठाउने तयारीमा सभापति देउवा छन् ।

कांग्रेसले कसको नेतृत्वमा सरकारमा सहभागी हुने केन्द्रीय कार्यसम्पादन र संसदीय दल बैठकबाट निर्णय गर्ने तयारी समेत गरेको छ ।

मन्त्री छान्दा योग्यता, क्षमता र समावेशीतालाई ध्यान दिने पनि कांग्रेसले बताएको छ । सात प्रदेशबाट एक-एक जना प्रतिनिधित्व हुने गरी मन्त्री पठाउने तयारीमा कांग्रेस छ । केन्द्रीय कार्यसम्पादन समिति बैठकले नै मन्त्री छान्ने मापदण्ड बनाइसकेको छ ।

प्रधानमन्त्री दाहालले दुई/तीन दिनभित्र मन्त्रिपरिषद बिस्तार गर्ने तयारी गरेका छन् । दाहालले १६ मन्त्रालय आफैंले हेर्दै आएका छन् । दाहालले गृह मन्त्रालय आफैंसँग राख्न खोजेका छन् । कांग्रेस, रास्वपा, एकीकृत समाजवादीले पनि गृह आफूहरूलाई चाहिने दाबी गरेको स्रोत बताउँछ । दाहालले गृहबाहेक मन्त्रालय दिने गरी रास्वपालाई पनि सरकारमा ल्याउन चाहेका छन् ।

प्रधानमन्त्री दाहालले विश्वासको मत दिएका सबै दलसँग एक पटक भेटवार्ता गरेर मन्त्रालयबारे कुराकानी गरिसकेकोले अब सत्ता गठबन्धन बैठक राखेर मन्त्रालय प्रस्ताव गर्ने तयारीसमेत गरेका छन् ।

सरकार बिस्तार लगायतबारे माओवादी पदाधिकारी बैठकमा शनिबार छलफल भएको थियो । नेता देवेन्द्र पौडेलका अनुसार सोमबारभित्र मन्त्रिपरिषद बिस्तार गर्न गृहकार्य भइरहेको छ ।

दाहालले गत चैत ६ मा विश्वासको मत लिएका थिए ।

उनले दुई/चार दिनभित्र मन्त्रिपरिषद बिस्तार गरिसक्ने बताए पनि 'भाका' नाघेको छ ।

मन्त्रिपरिषद बिस्तारमा ढिलाइ हुँदा सरकारका कामकारबाही प्रभावित हुने गरेका छन् । कसले कति मन्त्रालय र कुन-कुन मन्त्रालय लिने टुंगो लगाउन सकस परेको छ । सेतोपाटी

प्रकाशित मिति: आइतबार, चैत १२, २०७९ ०८:१९