'चिनियाँ विस्तारवाद नरोकिएसम्म नेपालको विकास हुँदैन'

समाचार

गृहपृष्ठ
समाचार
'चिनियाँ विस्तारवाद नरोकिएसम्म नेपालको विकास हुँदैन'

'चिनियाँ विस्तारवाद नरोकिएसम्म नेपालको विकास हुँदैन'

आइतबार, चैत १२, २०७९ बागेश्वरी पोस्ट

काठमाडौं । संविधानसभा सदस्य विपी यादवले चिनियाँ विस्तारवाद नरोकिएसम्म नेपालको विकास सम्भव नहुने बताएका छन् ।

आज काठमाडौंमा राष्ट्रिय एकता अभियानले आयोजना गरेको 'नेपालप्रति चिनियाँ अभ्यास र असर' विषयक विचारगोष्ठीमा बोल्दै उनले चीनले पछिल्लो समय नेपालमाथि विभिन्न कोणबाट आँखा लगाइरहेको टिप्पणी गरे । उनले भने, "कहिले चीनका लागि नेपाली राजदूतको ओहोदा प्रमाणपत्र नबुझिदिने त कहिले काठमाडौंमा रहेको चिनियाँ दूतावासमार्फत चीनले नेपालको आन्तरिक राजनीतिमा हस्तक्षेप गर्न लगायतको काम गरिरहेको छ ।" उनले चीनको विस्तारवादी नीतिलाई सबै जना मिलेर नरोकेसम्म नेपालको विकास सम्भव नहुने दोहोर्‍याए ।

त्यस्तै गोष्ठीमा सहभागी विश्लेषक बुद्ध छोरिंग लामाले नेपाललाई श्रीलंका बनाउने रणनीतिमा चीन लागेको आरोप लगाए । उनले भने, "चीनले नेपाललाई श्रीलंका बनाउनु खोजिरहेको छ, चीनले पोखरा विमानस्थलमा लगानी गरेर विमानस्थल कब्जामा लिने षड्यन्त्र गरिरहेको छ।" त्यसैगरी वरिष्ठ अधिवक्ता अवधेश सिंहले चीनको विस्तारवादी नीतिविरुद्ध सबै जना एकजुट हुनुपर्नेमा जोड दिए । उनले चीनले बीआरआईमार्फत नेपाललाई ऋण जालमा पार्न विभिन्न कोणबाट कसरत गरिरहेको आरोप लगाए । उनले भने, "चीनको विस्तारवादी नीतिलाई रोक्नुपर्छ, नेपाललाई चिनियाँ ऋणको जालमा फस्न दिनुहुँदैन ।"

त्यस्तै अर्का सहभागी सीताराम अग्रवालले चीनले पछिल्लो समय नेपालको भूभाग पनि मिचेको समाचार पत्रपत्रिकामा पढिरहेको बताए । कार्यक्रममा सहभागी अभियानका केन्द्रीय सदस्य चन्द्र यदुवंशी, शहिद परिवारका सदस्य एवं प्रधानमन्त्री सचिवालय सदस्य बबिता ठाकुर, पत्रकार महासंघ सप्तरीका उपाध्यक्ष अम्बिका दाहाल लगायतले चीनको विस्तारवादी नीतिलाई जरैदेखि फाल्नुपर्नेमा जोड दिएका थिए ।

प्रकाशित मिति: आइतबार, चैत १२, २०७९ २०:१७

प्रतिक्रिया दिनुहोस्