पदाधिकारी नै सरकारमा जान थालेपछि कांग्रेसभित्र असन्तुष्टी चुलियो

राजनीति

गृहपृष्ठ
राजनीति
पदाधिकारी नै सरकारमा जान थालेपछि कांग्रेसभित्र असन्तुष्टी चुलियो

पदाधिकारी नै सरकारमा जान थालेपछि कांग्रेसभित्र असन्तुष्टी चुलियो

दीपक गिरी पनि मन्त्री बन्ने लाइनमा

बुधबार, चैत १५, २०७९ बागेश्वरी पोस्ट

काठमाडौं । नेपाली कांग्रेसले पदाधिकारीलाई समेत सरकारमा पठाउने तयारी गरिरहँदा पार्टीभित्र चरम असन्तुष्टी बढेको छ ।

केन्द्रीय पदाधिकारीहरूलाई नै सरकारमा पठाउँदा पार्टी र संगठन झन लथालिङ्ग हुने भन्दै कतिपय केन्द्रीय सदस्यहरूले चिन्ता व्यक्त गरेका छन् ।

त्यसले गर्दा एकातिर पार्टी, संगठन कमजोर हुने र सरकारमा पनि ‘परफमेन्स’ राम्रो नहुने उनीहरूको भनाइ छ ।

यद्यपि मन्त्रालयको भागवण्डा टुङ्गिएको छैन । त्यसका लागि सत्ता गठबन्धनका दलहरू आज पनि बैठक बस्दैछन् । राष्ट्रपतिको निर्वाचनमा सहमति हुन नसकेपछि नेकपा एमालेले सरकार छोडेको थियो । र, राष्ट्रपतिमा नेपाली कांग्रेसका उम्मेदवारलाई सत्ता नेतृत्व गरिरहेको नेकपा माओवादी लगायत अरू दलहरूले मत दिएका थिए । त्यसपछि नेपाली कांग्रेस पनि सरकारमा सहभागी हुने भएको हो ।

नेपाली कांग्रेसले प्रधानमन्त्रीमा अडान नछोडेपछि माओवादी अध्यक्ष पुष्पकमल दाहाल नेकपा एमालेसँग मिलेर प्रधानमन्त्री भएका थिए । त्यही सहमतिका आधारमा पुस १० गते एमालेसहितको नयाँ गठबन्धन बन्यो र संसदमा सबैभन्दा धेरै सांसद भएको नेपाली कांग्रेसले सत्ता गुमाउनुपर्‍यो । सरकार गठनको तीन महिना नपुग्दै प्रधानमन्त्रीले फेरि विश्वासको मत लिनुपर्ने अवस्था आयो । सुरुमै प्रचण्ड सरकारलाई विश्वासको मत दिएको नेपाली कांग्रेसले त्यसपछि माओवादीसँग निकटता जोगाउँदै लगेको थियो ।

नेकपा एमाले, राप्रपा र राष्ट्रिय स्वतन्त्र पार्टीले समेत सरकार छोडेपछि अहिले १६ मन्त्रालय खाली छन् । तीमध्ये करिब करिब ८ मन्त्रालय नेपाली कांग्रेसले लिने भएको छ । उपप्रधानसहित सरकारमा कांग्रेसको नेतृत्व पार्टी उपसभापति पूर्णबहादुर खड्काले गर्ने टुङ्गो कांग्रेसले लगभग लगाइसकेको छ।

नेपाली कांग्रेसले अर्थ, रक्षा र परराष्ट्र जस्ता शक्तिशाली मन्त्रालयसहित भौतिक, पूर्वाधार मन्त्रालय पनि आफूले दाबी गरिरहेको छ । अर्थ, रक्षा र परराष्ट्र मन्त्रालय यसअघि नेकपा एमालेको भागमा परेको थियो । कानुन, न्याय तथा संसदीय मामिला, युवा तथा खेलकुद, भूमि व्यवस्था, बालबालिका तथा ज्येष्ठ नागरिक मन्त्रालयमा पनि नेपाली कांग्रेसले दाबी गरिरहेको छ । भौतिक मन्त्रालयको विकल्पमा उसले कृषी मन्त्रालय पनि दाबी गरेको छ ।

यद्यपि कसले कति मन्त्रालय पाउने भन्ने टुङ्गो सत्ता साझेदारले लगाइसकेका छैनन् ।

नेपाली कांग्रेसबाट अहिले सरकारमा उपसभापति खड्काले नेतृत्व गर्ने लगभग पक्कापक्की भएको छ । खड्काले सुरूमा गृहमा दाबी गरे पनि त्यो मन्त्रालय भने माओवादीले लैजाने संकेत गरिसकेको छ । भौतिक मन्त्रालय सम्हाल्दै आएका माओवादीका नारायणकाजी श्रेष्ठले आफ्नो मन्त्रालयको तीन महिने प्रगती विवरण सार्वजनिक गरेर गृहमा जाने संकेत दिएका छन् ।

यद्यपि पत्रकार सम्मेलनमा उनले भनेका थिए, ‘कुन मन्त्रालयको जिम्मेवारी कसले पाउने र कसलाई दिने भन्ने निर्णय प्रधानमन्त्रीको हुन्छ । त्यसमा मेरो केही हुँदैन ।’

कांग्रेसबाट प्रवक्ता प्रकाशशरण महत पनि सरकारमा सहभागी हुने चर्चा छ । उनले पनि अर्थमा दाबी गरिरहेका छन् । त्यो मन्त्रालय बाहेक अर्को मन्त्रालयमा जान नचाहेमा खड्का बाहिरिने छन् र सरकारमा कांग्रेसको नेतृत्व महतले नै गर्नेछन् । अर्थपछि महतको प्रथामिकता परराष्ट्र हो । त्यसमा पार्टी सभापति देउवा पनि लगभग सहमत छन् ।

कांग्रेसभित्र अहिले सरकारमा जान र मन्त्रालय पाउनका लागि समूहगत रूपमा पनि चर्काचर्की भइरहेको छ । आठ मन्त्रालय पाएको बखत तीन मन्त्रालयमा शेखर कोइराला समूहले दाबी गरिरहेको छ । यो समूहबाट दुई महामन्त्री गगन थापा र विश्वप्रकाश शर्माले अर्का युवा नेता प्रदीप पौडेललाई सरकारमा पठाउन प्रस्ताव गरेका छन् । त्यस्तै कोइरालाले भने आफ्ना तर्फबाट धनराज गुरुङ र डिकबहादुर लिम्बुलाई प्रथमिकतामा राखेका छन् । त्यस्तै केन्द्रीय सदस्य तथा पूर्व मन्त्री दीपक गिरी पनि मन्त्री बन्ने लाइनमा छन् ।

उपसभापति खड्का, महत, एनपी सावद, रमेश रिजाल, सीता गुरुङ, किशोरसिंह राठौर, मोहन बस्नेत, रामहरि खतिवडालाई देउवाले सरकारमा पठाउने तयारी गरेका छन् । त्यसबाहेक विनोद चौधरी पनि मन्त्री बन्नका लागि दौडधुप गरिरहेका छन् ।

कांग्रेसले सरकारमा पठाउनका लागि प्राथमिकतामा राखेका कतिपय नामहरूमा भने देउवा पक्ष र कोइराला पक्षका कतिपय केन्द्रीय सदस्यहरूले असहमति प्रकट गरेका छन् ।

‘पार्टी र संगठन पनि त चलायमान गराउनुपर्छ नि’ कोइराला समूहका एक केन्द्रीय सदस्य भन्छन्, ‘पदाधिकारीहरू नै सरकारमा गएर भासिने हो भने पार्टी र संगठन झन लथालिङ्ग हुन्छ भन्ने हाम्रो चिन्ता हो ।’

उनीहरूका अनुसार अहिले सत्ताको नेतृत्व अरू नै पार्टीले गरिरहेका बखत सरकारमा समेलमात्रै हुँदा जनचाहना अनुसार कांग्रेसका मन्त्रीहरूले काम देखाउन पनि सक्दैनन् ।

देशको अर्थतन्त्र खलबलिएको र जनआक्रोश व्यापक बढिरहेका बेला कम्तीमा अनुभवीहरूलाई सरकारमा पठाउन उनीहरूले पार्टी सभापतिलाई सुझाव त दिएका छन् तर देउवाले त्यो कुरालाई गम्भिरताका साथ नलिएको उनीहरूको भनाइ छ ।

‘यो बेला कम्तीमा अनुभव संगालेकाहरूलाई सरकारमा पठाउँदा अलि राम्रो हुन्छ’ कोइराला निकट ती सांसद भन्छन् ‘पटक पटक एउटै मान्छे दाहोरिनुपर्छ भनेको होइन तर यो स्थिति सम्हाल्नका लागि अनुभव पनि चाहिन्छ । नयाँहरू जाँदा झन अलमल हुन्छ । पार्टी पनि चलायमान हुँदैन । सरकारबाट पनि परफर्मेन्स देखिँदैन ।’

प्रकाशित मिति: बुधबार, चैत १५, २०७९ १०:४६