गठबन्धनले मुलुकलाई ओरालो यात्रामा लगेको केपी ओलीको आरोप

राजनीति

गृहपृष्ठ
राजनीति
गठबन्धनले मुलुकलाई ओरालो यात्रामा लगेको केपी ओलीको आरोप

गठबन्धनले मुलुकलाई ओरालो यात्रामा लगेको केपी ओलीको आरोप

सोमबार, चैत २७, २०७९ बागेश्वरी पोस्ट

नेपालगञ्ज । नेकपा एमालेका अध्यक्ष केपी शर्मा ओलीले सत्तारुढ गठबन्धनले मुलुकलाई ओरालो यात्रामा लगेको आरोप लगाएका छन् । राष्ट्रिय युवा संघ नेपालको नवौं राष्ट्रिय महाधिवेशनको आज नेपालगञ्जमा उद्घाटन गर्दै अध्यक्ष ओलीले सत्तारुढ गठबन्धनको संस्कृति राजनीतिक, बैचारिक नभएको भन्दै मुलुकलाई बर्बादीतर्फ धकेल्न उद्यत रहेको जिकिर समेत गरे । अहिलेको गठबन्धन सरकारले जनताका लागि कुनै काम नगरेको ओलीको टिप्पणी छ ।

वर्तमान सरकार विकास र समृद्धिको बाधक भएको बताउँदै उनले एमाले फेरि सरकारमा गए विकास र समृद्धिको यात्रामा मुलुक अघि बढ्ने दाबी समेत गरे । युवा संघलाई उनले एमालेको बलियो खम्बाको रुपमा व्याख्या गर्दै पार्टीविरुद्ध घेराबन्दी हुँदा युवा संघ सडकमा उत्रिएको स्मरण गरे ।

अधिवेशनको उद्घाटन समारोहलाई उपाध्यक्ष विष्णु पौडेल, महासचिव शंकर पोखरेल, पोलिटव्यूरो सदस्य एवम युवा विभाग इन्चार्ज महेश बस्नेत लगायतले सम्बोधन गरेका थिए । युवा संघका अध्यक्ष किरण पौडेलको अध्यक्षतामा उद्घाटन कार्यक्रम सम्पन्न भएको थियो । महाधिवेशन नयाँ नेतृत्व चयन गर्दै चैत २९ गते सकिनेछ । महाधिवेशनमा करिब दुई हजार प्रतिनिधिको सहभागिता छ ।

प्रकाशित मिति: सोमबार, चैत २७, २०७९ २०:२५

प्रतिक्रिया दिनुहोस्