स्व.कोइरालालाई 'नेपाल रत्न' बिभूषण, भाइबुहारी किरणद्वारा ग्रहण

राजनीति

गृहपृष्ठ
राजनीति
स्व.कोइरालालाई 'नेपाल रत्न' बिभूषण, भाइबुहारी किरणद्वारा ग्रहण

स्व.कोइरालालाई 'नेपाल रत्न' बिभूषण, भाइबुहारी किरणद्वारा ग्रहण

शुक्रबार, वैशाख १, २०८० बागेश्वरी पोस्ट

नेपालगन्ज । राष्ट्रपति रामचन्द्र पौडेलले राष्ट्रको गौरव बढाउन अतुलनीय योगदान गर्ने पूर्व प्रधानमन्त्री स्व. सुशील कोइरालासहित समाजका विभिन्न क्षेत्रका सात सय २८ व्यक्तित्वलाई विभिन्न मानपदवी प्रदान गरेका छन् ।

राष्ट्रपति पौडेलले नेपाल रत्न पूर्व प्रधानमन्त्री स्व. कोइरालालाई प्रदान गरेका हुन् । राष्ट्रपति कार्यालय शीतल निवासमा आज आयोजित विशेष समारोहमा भाइबुहारी किरण कोइरालाले उक्त मानपदवी ग्रहण गरेकी थिइन् । उनी कांग्रेस बाँकेकी निवर्तमान सभापति हुन् । त्यसक्रममा स्वर्गीय कोइरालाका भतिजा सुधांशु कोइराला पनि उपस्थित थिए । उनी कांग्रेस बाँकेका सचिव हुन् । राष्ट्र गौरव राजनीतिज्ञ स्व. जीवराज न्यौपाने ‘आश्रित’, मन्त्रिपरिषद्का पूर्व अध्यक्ष खिलराज रेग्मी र संस्कृतिविद् स्व. सत्यमोहन जोशीलाई प्रदान गरे । सुप्रसिद्ध प्रबल जनसेवाश्री डा. जगमान गुरुङलाई प्रदान गरियो ।

राष्ट्रपति पौडेलले एक जनालाई नेपाल रत्न, तीन जनालाई राष्ट्र गौरव, एक जनालाई सुप्रसिद्ध प्रबल जनसेवाश्री, १४ जनालाई प्रसिद्ध प्रवल जनसेवाश्री, १६ जना सुकीर्तिमय राष्ट्रदीप, १ सय ६५ जनालाई सुप्रबल जनसेवाश्री, ६ जनालाई कीर्तिमय राष्ट्रदीप, ३ सय १६ जनालाई प्रवल जनसेवाश्री, एक जनालाई राष्ट्रदीप र २ सय ५ जनालाई जनसेवाश्री प्रदान गरे ।

मन्त्रिपरिषद्को सिफारिसमा तत्कालीन राष्ट्रपति विद्यादेवी भण्डारीले २०७९ असोज ३ गते संविधान दिवसका दिन उक्त विभूषणको घोषणा गरेकी थिइन् ।

नेपालको संविधानको धारा २७७ को उपधारा १ मा राष्ट्रपतिले राज्यका तर्फबाट प्रदान गरिने उपाधि, सम्मान र विभूषण प्रदान गर्ने उल्लेख छ ।

प्रकाशित मिति: शुक्रबार, वैशाख १, २०८० २०:२७

प्रतिक्रिया दिनुहोस्