लुम्बिनीका मुख्यमन्त्री लिला गिरीले वैशाख ११ गते दोस्रो पटक विश्वासको मत लिँदै

राजनीति

गृहपृष्ठ
राजनीति
लुम्बिनीका मुख्यमन्त्री लिला गिरीले वैशाख ११ गते दोस्रो पटक विश्वासको मत लिँदै

लुम्बिनीका मुख्यमन्त्री लिला गिरीले वैशाख ११ गते दोस्रो पटक विश्वासको मत लिँदै

सोमबार, वैशाख ४, २०८० बागेश्वरी पोस्ट

नेपालगन्ज । लुम्बिनी प्रदेशका मुख्यमन्त्री लिला गिरीले यही वैशाख ११ गते विश्वासको मत लिने भएका छन् ।

मुख्यमन्त्री गिरीले दोस्रो पटक विश्वासको मत लिनका लागि लुम्बिनी प्रदेशसभाको बैठक ११ गते बिहान ११ बजे राखिएको प्रदेशसभा सचिव दुर्लभकुमार पुनले जानकारी दिएका छन् ।

मुख्यमन्त्री गिरी गत पुस २७ गते मुख्यमन्त्री नियुक्त भई माघ ५ गते पहिलोपटक विश्वासको मत लिएका थिए ।

राष्ट्रपतिको निर्वाचनले सत्ता समीकरण बदलिएपछि माओवादी केन्द्र लगायतका दलले चैत १२ गते सरकारलाई दिएको समर्थन फिर्ता लिएपछि गिरीले विश्वासको मत लिन लागेका हुन् ।

लुम्बिनीमा नेपाली कांग्रेस, माओवादी केन्द्रसहित प्रदेशसभाका १० दलमध्ये ८ दल र एक जना स्वतन्त्र समेत ५३ सांसदले कांग्रेसका डिल्ली चौधरीलाई मुख्यमन्त्री नियुक्त गर्न माग गर्दै प्रदेश प्रमुखलाई हस्ताक्षर बुझाइसकेका छन् । ८७ सांसद रहेको लुम्बिनीमा बहुमतका लागि ४४ मत चाहिन्छ । अहिले एमालेका २९ र राप्रपाका ४ सांसदले मात्रै सरकारलाई समर्थन गरेका छन् ।

वैशाख ११ गते विश्वासको मत नपाएको खण्डमा सबैभन्दा ठूलो दलको हैसियतले संविधानको धारा १६८(३) अनुसार सरकारको नेतृत्व दाबी गर्ने एमालेका एक नेताले बताए ।

प्रकाशित मिति: सोमबार, वैशाख ४, २०८० १६:५३