मुलुकभर ६० हजार १८५ उद्योग प्रतिष्ठानहरु सञ्चालनमा

समाचार

गृहपृष्ठ
समाचार
मुलुकभर ६० हजार १८५ उद्योग प्रतिष्ठानहरु सञ्चालनमा

मुलुकभर ६० हजार १८५ उद्योग प्रतिष्ठानहरु सञ्चालनमा

मंगलबार, वैशाख ५, २०८० बागेश्वरी पोस्ट

नेपालगञ्ज । मुलुकभर ६० हजार १८५ उद्योग प्रतिष्ठानहरु सञ्चालनमा छन् । राष्ट्रिय औद्योगिक सर्वेक्षण अनुसार ती औद्यागिक प्रतिष्ठानहरुमा संलग्न रहेका व्यक्तिहरुको संख्या ४ लाख ९१ हजार २ सय २७ रहेको छ । तथ्यांक संकलनमा कोभिड १९ महामारीका प्रभावका कारण समयावधि लम्बिएको थियो ।

राष्ट्रिय औद्योगिक सर्वेक्षणको प्रदेश स्तरीय नतिजा सम्बन्धमा आयोजित अन्तरक्रिया कार्यक्रममा सर्वेक्षण विवरण प्रस्तुत गर्दै राष्ट्रिय तथ्यांक कार्यालयका निर्देशक राजेश धितालले लुम्बिनी प्रदेशमा १० हजार ५०८ उद्योग प्रतिष्ठानहरु रहेको बताए । यी प्रतिष्ठानहरुमा ८७ हजार ६७ जना संलग्न छन् । देशभर रहेका उद्योग प्रतिष्ठानहरुमा तलबी कामदार भने ३ लाख ८१ हजार ६८७ जना छन् । लुम्बिनी प्रदेशमा यो संख्या ६७ हजार १९२ छ । धितालले ३९.९ प्रतिशत उद्योग प्रतिष्ठानहरुले मात्र उत्पादन क्षमताको पूर्ण उपयोग गरेको विवरण प्रस्तुत गरे । राष्ट्रिय औद्योगिक सर्वेक्षण २०७६ फागुन २१ गते सुरु भई २०७८ असार मसान्तमा सम्पन्न गरिएको थियो । सर्वेक्षण अनुसार औद्योगिक प्रतिष्ठानहरुले देशभरमा करिब ८ खर्ब ४६ अर्ब ६६ करोड मूल्य बराबरको लागत रकम लागतको रुपमा खर्च गरी करिब १२ खर्ब १ अर्ब १७ करोड मूल्य बराबरका बस्तु तथा सेवा उत्पादन गरेको देखिन्छ ।

कोभिड १९ को महामारीको समयमा सरकारले गरेको करिब ४ महिनाको लकडाउन अवधिमा नेपालमा सञ्चालनमा रहेका करिब ६३ प्रतिशत उद्योगहरु पूर्णरुपमा बन्द भएको सर्वेक्षणले देखाएको छ । तथ्यांक कार्यालय नेपालगञ्जद्वारा आयोजित राष्ट्रिय औद्योगिक सर्वेक्षणको प्रदेश स्तरीय नतिजा सम्बन्धि अन्तरक्रिया कार्यक्रममा बाँकेका सहायक प्रमुख जिल्ला अधिकारी हरिप्रसाद शर्मा, राष्ट्रिय तथ्यांंक कार्यालयका राष्ट्रिय उपतथ्यांक अधिकृत डिल्लीराज सुवेदी, तथ्यांक कार्यालय नेपालगञ्जका प्रमुख बेदप्रसाद ढकाल लगायत सरोकारवाला उपस्थित थिए ।

प्रकाशित मिति: मंगलबार, वैशाख ५, २०८० १८:१६

प्रतिक्रिया दिनुहोस्