भजनीका स्वास्थ्यकर्मीहरुले ४ महिनादेखि तलब पाएनन्

स्वास्थ्य

गृहपृष्ठ
स्वास्थ्य
भजनीका स्वास्थ्यकर्मीहरुले ४ महिनादेखि तलब पाएनन्

भजनीका स्वास्थ्यकर्मीहरुले ४ महिनादेखि तलब पाएनन्

बुधबार, वैशाख ६, २०८० बागेश्वरी पोस्ट

नेपालगन्ज । कैलालीको भजनी नगरपालिकामा कार्यरत स्वास्थ्यकर्मीले ४ महिनादेखि पारिश्रमिक पाएका छैनन् ।

संघीय सरकारबाट स्थानीय तहमा समायोजन भएर आएका ४० स्वास्थ्यकर्मीले ४ महिनादेखि तलब पाउन सकेका छैनन् ।नगरपालिकाका स्वस्थ्य शाखा प्रमुख कैलाश चौधरी स्वास्थ्यकर्मीले तलबभत्ता नपाउँदा दिनहुँ किचलो हुने गरेको बताउँछन् । नगरपालिकाले करार तथा ज्यालादारीमा राखेका कर्मचारीलाई भने पारिश्रमिक उपलब्ध गराएको उनको भनाइ छ ।

चौधरी भन्छन्, “४ महिनादेखि बिनातलब काम गर्नुपरेको छ, घरखर्च कसरी चलाउने भन्ने स्थिति छ ।” संघीय सरकारले दुई किस्तामा रकम उपलब्ध गराएको चौधरीले बताए । पहिलो किस्तामा एक करोड ९२ लाख रुपैयाँ र दोस्रो किस्तामा ४२ लाख रुपैयाँ पठाएको थियो ।

चालू आवमा एक करोड ४२ लाख बजेट उपलब्ध भएको उनले बताए । चौधरीले भने, “स्थानीय तहले बजेट अभाव भएको भन्दै हाम्रो समस्या सुनवाइ गरेको छैन ।” तत्काल नगरपालिकाबाटै भए पनि २ महिनाको तलब उपलब्ध गराउन स्वास्थ्यकर्मीले माग गरेका छन् ।

नगरपालिकाका प्रमुख केवल चौधरीले स्वास्थ्यकर्मीको समस्या नगरपालिकाले समाधान गर्न नसक्ने बताए । स्वास्थ्यकर्मीलाई तलव खुवाउने जिम्मा संघीय सरकारको भएको उनको भनाइ छ ।

“कर्मचारी संघीय सरकारबाट आएका हुन् । उनीहरूको सेवासुविधा संघीय सरकारले नै बेहोर्नुपर्छ”, नगरप्रमुख चौधरीले भने, “हामीले नियुक्त गरेका कर्मचारीको सेवासुविधा रोकेका छैनौँ ।” रासस

प्रकाशित मिति: बुधबार, वैशाख ६, २०८० १४:०८