उपनिर्वाचन २०८०: मौन अवधिमा के-के गर्न पाइँदैन ?

राजनीति

गृहपृष्ठ
राजनीति
उपनिर्वाचन २०८०: मौन अवधिमा के-के गर्न पाइँदैन ?

उपनिर्वाचन २०८०: मौन अवधिमा के-के गर्न पाइँदैन ?

शुक्रबार, वैशाख ८, २०८० बागेश्वरी पोस्ट

नेपालगन्ज । यही वैशाख १० गते हुने उपनिर्वाचनका लागि गएराति १२ बजेदेखि मौन अवधि लागू भएको छ । साथै यस अवधिमा निर्वाचन आयोगले प्रचारप्रसार गर्न रोक लगाएको छ ।

आयोगले वैशाख १० को साँझ ५ बजेसम्म मतदान केन्द्र बन्द नभएसम्म प्रचारप्रसार निषेधको अवधि कायम रहने जनाएको छ ।

यही आइतबार १० वैशाखमा बारा–२, चितवन–२ र तनहुँ–१ मा प्रतिनिधि सभा सदस्य पदका लागि उपनिर्वाचन हुँदैछ ।

निर्वाचनलाई स्वच्छ, स्वतन्त्र, निष्पक्ष, विश्वसनीय, पारदर्शी तथा भयमुक्त वातावरणमा सम्पन्न गर्न मतदान हुने दिनको अघिल्लो ४८ घण्टादेखि मतदानको दिन मतदान केन्द्र बन्द नहुञ्जेलसम्म प्रचारप्रसार निषेधको अवधि लागु हुने व्यवस्था गरिएको हो ।

मौन अवधिमा उम्मेदवारको पक्ष वा विपक्षमा कुनै पनि प्रकारको प्रचार प्रसार गर्न पाइँदैन । निर्वाचन प्रचारप्रसार लगायत कुनै पनि प्रकारका छलफल, अन्तरक्रिया, सभा, सम्मेलन, कार्यशाला, गोष्ठी आदि गर्न तथा उम्मेदवारको पक्ष वा विपक्षमा कुनै पनि प्रकारको प्रचारप्रसार गर्न, मत माग्न, एसएमएस, फेसबुक, भाइबरजस्ता विद्युतीय माध्यम तथा सामाजिक सञ्जालबाट मत माग्न निषेध गरिएको आयोगले जानकारी दिएको छ ।

यस अवधिमा निर्वाचन आचारसंहिता विपरीत वक्तव्य दिन, प्रेस विज्ञप्ति निकाल्न, प्रकाशन तथा प्रसारण गर्न, सञ्चार माध्यमबाट जित वा हारको पूर्वानुमानका सामग्री प्रसार जस्ता कार्य नगर्न- नगराउन आयोगले जानकारी दिएको छ ।

प्रकाशित मिति: शुक्रबार, वैशाख ८, २०८० ०७:५८