ढल्यो मुख्यमन्त्री लिला गिरी नेतृत्वको लुम्बिनी प्रदेश सरकार

राजनीति

गृहपृष्ठ
राजनीति
ढल्यो मुख्यमन्त्री लिला गिरी नेतृत्वको लुम्बिनी प्रदेश सरकार

ढल्यो मुख्यमन्त्री लिला गिरी नेतृत्वको लुम्बिनी प्रदेश सरकार

सोमबार, वैशाख ११, २०८० बागेश्वरी पोस्ट

नेपालगन्ज । लुम्बिनी प्रदेश सरकारका मुख्यमन्त्री लिला गिरी दोस्रो पटक विश्वासको मत नपाएपछि पदमुक्त भएका छन् । आज प्रदेशसभा बैठकबाट गिरीलाई ३३ जनाले मात्रै विश्वासको मत दिएका थिए ।

प्रदेशसभा बैठकमा ५३ जनाले विश्वासको विपक्षमा मत दिएपछि मुख्यमन्त्री गिरी नेतृत्वको सरकार ढलेको हो । गिरीलाई नेकपा एमालेका २९ र राप्रपाका ४ गरी ३३ सांसदले विश्वासको मत दिए ।

माओवादी केन्द्र, नेपाली कांग्रेस नागरिक उन्मुक्ति पार्टी, जनता समाजवादी पार्टी, लोकतान्त्रिक समाजवादी पार्टी, जनमत पार्टी, एकिकृत समाजवादी पार्टी, राष्ट्रिय जनमोर्चा र स्वतन्त्र सांसदले विपक्षमा मतदान गरेका थिए ।

८७ सदस्यीय लुम्बिनी प्रदेशसभामा सरकार गठनका लागि ४४ जना प्रदेशसभा सदस्यको समर्थन आवश्यक पर्छ । लुम्बिनीमा एमालेका २९, नेपाली कांग्रेसका २७, माओवादी केन्द्रका ११, राप्रपा र नागरिक उन्मुक्ति पार्टीका ४-४, जसपा, जनमत र लोसपाका ३-३ सदस्य छन् ।

त्यस्तै स्वतन्त्रबाट निर्वाचन जितेका २ जनाले माओवादी केन्द्र रोजे पनि एक जनाले कुनै पनि दल रोजेका छैनन् भने नेकपा एकीकृत समाजवादी र राष्ट्रिय जनमोर्चाका १-१ सदस्य छन् ।

यसअघि मुख्यमन्त्री गिरीलाई दिएको समर्थन फिर्ता लिँदै गत चैत १२ गते नै नेपाली कांग्रेसका डिल्ली चौधरीलाई मुख्यमन्त्री बनाउन माग गर्दै विभिन्न ८ दलका ५३ सांसदले प्रदेश प्रमुखलाई हस्ताक्षर बुझाइसकेका छन् ।

एमालेले भने विश्वासको मत नपाए पनि ठूलो दलका हैसियतले सरकारको नेतृत्व दावी गरेको छ ।

तर, अब ५३ सांसदले लुम्बिनी प्रदेशमा नेपाली कांग्रेसका डिल्लीबहादुर चौधरी मुख्यमन्त्री बनाउने भन्दै हस्ताक्षर बुझाइसकेकाले चौधरी मुख्यमन्त्री बन्ने सम्भावना बढेको छ ।

प्रकाशित मिति: सोमबार, वैशाख ११, २०८० १३:४८