लुम्बिनीका मुख्यमन्त्रीको विश्वासको मत लिने दिन मंगलबारका लागि सर्यो

राजनीति

गृहपृष्ठ
राजनीति
लुम्बिनीका मुख्यमन्त्रीको विश्वासको मत लिने दिन मंगलबारका लागि सर्यो

लुम्बिनीका मुख्यमन्त्रीको विश्वासको मत लिने दिन मंगलबारका लागि सर्यो

आइतबार, वैशाख १७, २०८० बागेश्वरी पोस्ट

फाइल फोटो

नेपालगन्ज । लुम्बिनीका नवनियुक्त मुख्यमन्त्री डिल्लीबहादुर चौधरीले विश्वासको मत लिने एक दिन पछि सरेको छ ।

यसअघि सोमबार विश्वासको मत लिने टुङ्गोमा पुगेका मुख्यमन्त्री चौधरी उक्त दिन अन्तर्राष्ट्रिय श्रमिक दिवसको सार्वजनिक बिदा परेकाले मंगलबारका लागि तय भएको प्रदेश सरकारका मन्त्री सन्तोष पाण्डेले जानकारी दिएका छन् ।

प्रदेश सभामा रहेका आठ दलको समर्थनमा वैशाख १४ गते मुख्यमन्त्री नियुक्त भएका चौधरीले विश्वासको मत लिएपछि मात्रै मन्त्रिमण्डललाई पूर्णता दिने योजना बनाएका छन् ।

गठबन्धन दलमा मन्त्रालयको भागवण्डा नटुङ्गिएका कारण चार सदस्यीय मन्त्रिमण्डल गठन गरिएको छ । मुख्यमन्त्रीसँगै नियुक्त भएका तीन जना मन्त्री पनि विना विभागीय रहेका छन् ।

मुख्यमन्त्री चौधरीले मंगलबार विश्वासको मत लिने कार्यक्रम तय भएर प्रदेश सभालाई जानकारी गराएको मन्त्री पाण्डेले जानकारी दिए । मुख्यमन्त्रीले विश्वासको मत लिने भएपछि प्रदेशसभाको अधिवेशन सोही दिनका लागि बोलाइएको छ ।

प्रदेशसभाको पहिलो अधिवेशनको दशौँ बैठक वैशाख १९ गते मङ्गलवार बिहान ११ बजे बस्ने गरी तय भएको प्रदेशसभा सचिव दुर्लभकुमार पुनले जारी गरेको सूचनामा जनाइएको छ ।

प्रकाशित मिति: आइतबार, वैशाख १७, २०८० १८:५४