विराटनगरमा अनिश्चितकालीन निषेधाज्ञा जारी

राजनीति

गृहपृष्ठ
राजनीति
विराटनगरमा अनिश्चितकालीन निषेधाज्ञा जारी

विराटनगरमा अनिश्चितकालीन निषेधाज्ञा जारी

शनिबार, जेठ १३, २०८० बागेश्वरी पोस्ट

नेपालगन्ज । प्रदेश नम्बर १ लाई कोशी प्रदेश नामाकरण गरेपछि सुरु भएको आन्दोलन अझै जारी छ । आन्दोलन झनै चर्किन सक्ने सम्भावनालाई मध्येनजर गर्दै आजदेखि कोशी प्रदेशको राजधानी विराटनगरमा अनिश्चितकालका लागि निषेधाज्ञा जारी गरिएको छ ।

कोशी नामकरणको विरोधमा ‘पहिचानवादी’बाट हुन सक्ने सम्भावित आन्दोलनलाई ध्यान दिँदै निषेधाज्ञा जारी गरिएको हो ।

जस अनुसार आज बिहान ६ बजेबाट अर्को आदेश नभएसम्मका लागि अनिश्चितकालीन निषेधित क्षेत्र घोषणा गरिएको छ ।

मोरङका प्रमुख जिल्ला अधिकारी वीरेन्द्रकुमार यादवका अनुसार निषेधित क्षेत्रमा सर्वसाधारण तथा सवारीसाधन आवतजावत बाहेक सभा, जुलुस, भेला, र्‍याली, धर्ना जस्ता कार्यक्रममा रोक लगाइएको छ ।

‘जिल्ला सुरक्षा समिति, मोरङको निर्णयानुसार, मिति २०८०– २– १३ गते बिहान ६ बजेदेखि अर्को आदेश नभएसम्म निम्न स्थानहरूमा सर्वसाधारण तथा सवारी साधन आवतजावत बाहेक कुनै पनि किसिमको सभा, जुलुस, भेला, र्‍याली जस्ता कार्यहरू गर्न निषेध गरिएकाले सम्बन्धित सबैको जानकारी लागि यो सूचना प्रकाशित गरिएको छ’ जारी सूचनामा भनिएको छ ।

जस अनुसार पूर्वमा देवकोटा चोकदेखि पश्चिम कोशी अस्पतालसम्म, मुख्यमन्त्री तथा मन्त्रिपरिषद कार्यालय रोड चोकदेखि दक्षिण जतुवा चोकसम्म, मुख्यमन्त्री निवास वरपरको ३०० मिटरसम्म र जिल्ला प्रशासन कार्यालय मोरङको डाँफे चोकदेखि पूर्वको क्षेत्रसम्मलाई निषेधित क्षेत्र घोषणा गरिएको हो ।

यस आन्दोलनका क्रममा एक जनाको मृत्यु भइसकेको छ ।

प्रकाशित मिति: शनिबार, जेठ १३, २०८० ०८:५७