कांग्रेसमा शुद्धिकरण आवश्यक छः डा.मिनेन्द्र रिजाल

राजनीति

गृहपृष्ठ
राजनीति
कांग्रेसमा शुद्धिकरण आवश्यक छः डा.मिनेन्द्र रिजाल

कांग्रेसमा शुद्धिकरण आवश्यक छः डा.मिनेन्द्र रिजाल

शनिबार, जेठ १३, २०८० बागेश्वरी पोस्ट

कोहलपुर । नेपाली कांग्रेसका प्रभावशाली नेता डा.मिनेन्द्र रिजालले पार्टीमा शुद्धिकरण आवश्यक रहेको बताएका छन् । नेपाली कांग्रेस क्षेत्र नम्बर १ बाँकेको प्रथम क्षेत्रीय सम्मेलनको आज कोहलपुरमा उद्घाटन गर्दै उनले तलदेखि माथिसम्म शुद्धिकरण गरेर जानुपर्ने आवश्यकता रहेको बताए । "पार्टी अब नयाँ ढंगले चल्नुपर्दछ, परम्परागत हिसाबले हुँदैन, जनआकांक्षालाई बुझेर अघि नबढे दुर्घटना हुन्छ," डा.रिजालले भने- "नेतृत्वले सबै पक्षलाई मिलाएर लैजानुपर्दछ, सबैको भावनाको कदर गर्नुपर्दछ । केन्द्रिय सदस्य समेत रहेका पूर्व मन्त्री रिजालले संविधान कार्यान्वयनमा कांग्रेस गम्भीर हुनुपर्ने बताए ।

लुम्बिनी प्रदेश सभापति अमरसिंह पुनले पार्टीमा एकले अर्कोलाई दोष लगाएर उँभो नलाग्ने बताउँदै सबै एकताबद्ध भएर अघि बढ्नुपर्नेमा जोड दिए । पुनले नयाँ पुस्ताहरुले पनि भरोसा गर्न योग्य पार्टी बनाएर नयाँ र पुरानो पुस्तालाई जोडेर नवीन कांग्रेस बनाउनुपर्ने बताए । उनले नयाँ पार्टीहरुको परीक्षण बाँकी नै रहेकाले हतारमा आफ्नो सिद्धान्त र विचारलाई बन्धक बनाएर निर्णय नलिन कार्यकर्ताहरुलाई आग्रह गरे । क्षेत्रीय सभापति पोषण केसीको सभापतित्वमा सम्पन्न सम्मेलनलाई लुम्बिनी प्रदेश सह-महामन्त्री निमा गिरी, बाँकेका सभापति नारायणप्रसाद गौडेल, महासमिति सदस्य एवम् कोहलपुर नगरपालिकाका नगर प्रमुख पूर्णप्रसाद आचार्य, निवर्तमान पार्टी सचिव एवम् राप्तीसानारी गाउँपालिकाका अध्यक्ष तप्त पौडेल लगायतले सम्बोधन गरेका थिए ।

कार्यक्रममा प्रजातन्त्र सेनानी, सहिद परिवार, जन-आन्दोलनका घाइते, जग्गादाता, पूर्व क्षेत्रीय सभापतिहरु र उत्कृष्ट वडा सभापतिहरुलाई सम्मान गरिएको क्षेत्र नम्बर १ का प्रबक्ता तुलाराम खत्रीले जानकारी दिए ।सहिद घमण्ड गिरी, शंकर बहादुर शाह, जागेश्वर थारु, चोकबहादुर खत्रीलाई मरणोपरान्त सम्मान गरिएको छ । यस्तै प्रजातन्त्र सेनानी दुर्गा अधिकारी, चिर्कलाल थारु र गोविन्द ढकाललाई पनि सम्मान गरिएको थियो । जनआन्दोलनका घाइते अपांग भूपेन्द्रबहादुर खत्री र गोपालप्रसाद शर्मा तथा जग्गादाता मायाराम भाट, लोकबहादुर खत्री र विक्रम मौर्यलाई समेत सम्मान गरिएको खत्रीले बताए ।

यसैगरी पूर्व क्षेत्रीय सभापतिहरु स्व.माया गिरी, स्व.कुलमान थापा, नरबहादुर मल्ल, कृष्ण पौडेल, रामचन्द्र मौर्य, नारायणप्रसाद गौडेल र माधवराम खत्रीलाई पनि सम्मान गरिएको छ । यस्तै उत्कृष्ट वडा सभापतिहरुमा कोहलपुर १० का मेघनाथ भट्टराई, कोहलपुर ११ का प्रताप प्रताप खत्री, कोहलपुर ८ का बेलबहादुर खत्री, कोहलपुर १३ का कालीबहादुर वली, कोहलपुर १५ का दिपेन्द्र चौधरी, राप्तीसोनारी ९ का पूर्णबहादुर वली, राप्तीसोनारी ७ का दशरथ कुर्मी र नरैनापुर ३ का सलाउद्दिन खानलाई सम्मान गरिएको छ ।

क्षेत्रीय सम्मेलनमा सचिव खुमबहादुर बस्नेतले सांगठनिक प्रतिवेदन तथा कोषाध्यक्ष ध्रुब आचार्यले आर्थिक प्रतिवेदन प्रस्तुत गरेका थिए । क्षेत्र नम्बर १ (ख) का सभापति बलराम शर्माले स्वागत मन्तब्य व्यक्त गरेको कार्यक्रमको सञ्चालन सचिव जयश्वर पौडेलले गरेका थिए ।

No description available.