कोशी आन्दोलनमा २६ जना पक्राउ

राजनीति

गृहपृष्ठ
राजनीति
कोशी आन्दोलनमा २६ जना पक्राउ

कोशी आन्दोलनमा २६ जना पक्राउ

आइतबार, जेठ १४, २०८० बागेश्वरी पोस्ट

नेपालगन्ज । कोशी प्रदेशमा आन्दोलनमा उत्रिएका पहिचानवादी समूहका दुई दर्जन बढी आन्दोलनकारी पक्राउ परेका छन् ।

प्रदेशको बजेट अधिवेशन सुरू हुनुअघि पहिचानवादीहरू प्रदर्शनमा उत्रिएका हुन्। प्रदेशको नामकरण कोशी गरिएको विरोधमा उनीहरू प्रदर्शनमा उत्रिएका हुन्।

प्रदेशसभा सचिवालयअगाडि प्रदर्शन गर्न खोज्ने २६ जना प्रदर्शनकारीलाई प्रहरीले पक्राउ गरेको छ।

कोशी प्रदेसको नाम पहिचानका आधारमा हुनुपर्ने माग राख्दै प्रदेशसभा अगाडि प्रदर्शन गरिरहेका बेला उनीहरूलाई प्रहरीले पक्राउ गरेको हो।

निषेधित क्षेत्र तोडेर प्रदर्शन गर्न थालेपछि उनीहरूलाई पक्राउ गरिएको जिल्ला प्रहरी कार्यालय मोरङका प्रवक्ता डिएसपी रञ्जनकुमार दाहालले जानकारी दिएका छन् ।

प्रदेशसभाको बजेट अधिवेशन आजबाट सुरू हुँदैछ। बजेट अधिवेशनलाई लक्षित गरेर आन्दोलन घोषणा गरेका पहिचान पक्षधरले बिहानैदेखि प्रदेशसभा भवनअगाडि प्रदर्शनको तयारी गरेको थियो।

पहिचान पक्षधरले आन्दोलनको घोषणा गरेपछि प्रहरीले प्रदेशसभा भवन आसपासको क्षेत्रमा सुरक्षा व्यवस्था कडा बनाएको छ। त्यस्तै विराटनगर आउने सवारी साधनको चेकजाँचमा पनि प्रहरीले कडाइ गरेको छ।

कोशी प्रदेशको बजेट अधिवेशन आज दिउँसो २ बजेका लागि बोलाइएको छ। प्रदेशसभाले गत फागुन १७ गते प्रदेशको नामकरण गरेपछि पहिलोपटक बैठक बस्न लागेको हो।

प्रकाशित मिति: आइतबार, जेठ १४, २०८० १३:५०

प्रतिक्रिया दिनुहोस्