कांग्रेस रुपान्तरण अभियानका नेताहरु भन्छन्, 'पार्टी सुधार्न निरन्तर प्रश्न गरिरहन्छौं'

राजनीति

गृहपृष्ठ
राजनीति
कांग्रेस रुपान्तरण अभियानका नेताहरु भन्छन्, 'पार्टी सुधार्न निरन्तर प्रश्न गरिरहन्छौं'

कांग्रेस रुपान्तरण अभियानका नेताहरु भन्छन्, 'पार्टी सुधार्न निरन्तर प्रश्न गरिरहन्छौं'

बुधबार, जेठ २४, २०८० बागेश्वरी पोस्ट

नेपालगञ्ज । 'नेपाली कांग्रेस रुपान्तरण अभियान' सुरु गरेका नेताहरुले कांग्रेसको चाल, चरित्र र चेहरालाई परिवर्तन नगरी कांग्रेस रुपान्तरणको सम्भावना नभएको भन्दै आफूहरुले पार्टीको समय सापेक्ष रुपान्तरण गर्ने अभियान थालेको बताएका छन् ।

नेपाली कांग्रेस बाँकेले आज पार्टी कार्यालय नेपालगञ्जमा आयोजना गरेको कार्यकर्ता भेटघाट कार्यक्रमलाई सम्बोधन गर्दै पार्टी रुपान्तरण अभियानका नेताहरुले कांग्रेसभित्र नैतिक शक्तिको क्षय भएको भन्दै नैतिक शक्ति बलियो बनाउने अभियानमा आफूहरु लागेको बताए । परम्परागत शैली र आलोचना सुन्न नसक्ने प्रबृत्तिले पार्टी क्षयीकरणको दिशामा गइरहेको भन्दै उनीहरुले पार्टीलाई जागृत गर्न सातै प्रदेशमा बृहत भेला तथा अन्तरक्रिया कार्यक्रम आयोजना गरिरहेको बताए ।

केन्द्रिय सदस्य मधु आचार्यले कांग्रेसभित्र गैरकांग्रेसी चरित्रले बास गरेको बताउँदै कांग्रेसको कमी-कमजोरीहरुबाट फाइदा उठाएर देशको राजनीतिमा उग्रवामपन्थी र दक्षिणपन्थी शक्तिहरुको उदय भएको दाबी गरे । रुपान्तरण अभियान गुटबन्दी गर्नलाई नभई गुट अन्त्य गरेर समतामूलक कांग्रेस बनाउने अभियानमा लागिपरेको आचार्यको भनाई छ ।

युवा नेता गुरुराज घिमिरेले पार्टी विधि-विधान अनुसार नचल्दा बेथिति र विकृति बढेको बताए । विधानलाई लत्याउँदा पार्टी गलत दिशमा अघि बढेको बताए । घिमिरेले नेता कार्यकर्ताको सल्लाह सुझाब र प्रश्नलाई गाली सम्झने नेतृत्वको प्रबृत्ति नसच्चिँदासम्म प्रश्न गरिहनुपर्ने बताए । पार्टी सुधार्ने अभियानमा काँधमा काँध मिलाएर कसरी अगाडि बढ्ने भन्ने विषयमा आफूहरु देशभरका नेता कार्यकर्ताहरुको आवाज सुन्न जिल्ला जिल्लामा पुगिरहेको बताए ।

कार्यक्रममा 'नेपाली कांग्रेस रुपान्तरण अभियान' का नेताहरु रञ्जित कर्ण, भुपेन्द्रजंग शाही, जगदिश्वर नरसिंह केसी, देवराज चालिसे लगायत उपस्थित रहेको प्रबक्ता डिल्ली गिरीले जानकारी दिए । कार्यवहाक सभापति गोपालप्रसाद अधिकारीको सभापतित्वमा भएको कार्यक्रमको सञ्चालन सचिव सुधांशु कोइरालाले गरेका थिए ।

प्रकाशित मिति: बुधबार, जेठ २४, २०८० १९:०६