दिगो भविष्यका लागि फोहोरको उचित व्यवस्थापनका विषयमा छलफल

समाचार

गृहपृष्ठ
समाचार
दिगो भविष्यका लागि फोहोरको उचित व्यवस्थापनका विषयमा छलफल

दिगो भविष्यका लागि फोहोरको उचित व्यवस्थापनका विषयमा छलफल

आइतबार, असार १०, २०८० बागेश्वरी पोस्ट

नेपालगञ्ज । नेपालगञ्ज उपमहानगरपालिकाका नगर प्रमुख प्रशान्त विष्टले फोहोरमैला व्यवस्थापनमा परम्परागत शैली बदल्न जरुरी रहेको बताएका छन् । उनले प्रविधिको आत्मसाथ गर्दै समयसापेक्ष फोहोर व्यवस्थापन रणनीति अख्तियार गर्नुपर्ने आवश्यकता औंल्याए ।

"दिगो भविष्यका लागि फोहोरको उचित व्यवस्थापन" भन्ने नाराका साथ फोहोरको (कम प्रयोग, पुनः प्रयोग र प्रशोधित प्रयोग) 3R रणनीतिलाई प्रबद्र्धन गर्न भेरी वातावरणीय विशिष्टता समूह (बी-ग्रुप) द्वारा आयोजित कार्यक्रममा बोल्दै नगर प्रमुख विष्टले फोहोर व्यवस्थापनमा नेपालगञ्ज उपमहानगरपालिका गम्भीरतापूर्वक लागेको बताए । नागरिक तहमा व्यवहार परिवर्तन जरुरी रहेको बताउँदै उनले फोहोर व्यवस्थापनमा नगरबासीको जागरण र प्रतिबद्धता खोजे । ल्याण्डफिल साइट र स्वास्थ्यजन्य फोहोर प्रशोधन केन्द्र सञ्चालनले फोहोर व्यवस्थापनमा सहजता भएको बताउँदै उनले दिगो भविष्यको रणनीति बनाउन थप गृहकार्य गरेर अघि बढ्न जरुरी रहेको बताए ।

No description available.

बी-ग्रुपका अध्यक्ष टेक बहादुर पुनको अध्यक्षता एवम् नगर प्रमुख विष्टको प्रमुख आतिथ्यतामा भएको कार्यक्रममा नेपालगञ्ज उपमहानगरपालिका वातावरण तथा विपत शाखा प्रमुख प्रकाश डिसीले नेपालगञ्ज उपमहानगरपालिकामा फोहोरमैला व्यवस्थापनको वर्तमान अवस्था र भावी योजना, त्रिभुवन विश्वविद्यालय रसायनशास्त्र विभागका उपप्राध्यापक डा. ज्योति गिरीले फोहोरको कम प्रयोग, पुनः प्रयोग र प्रशोधित प्रयोग, नेपाल विज्ञान तथा प्रविधि प्रज्ञा प्रतिष्ठानका वैज्ञानिक डा. रबिन्द्रप्रसाद ढकालले फोहोर व्यवस्थापन नीति तथा सुशासन, त्रिभुवन विश्वविद्यालयका उपप्राध्यापक डा. राजेशकेशर खनाल फोहोर व्यवस्थापनमा समुदाय र शैक्षिक संस्थाहरुको संलग्नता र आरभिएम प्लास्टिक सोलुसन नेपालका संस्थापक जोसेफ श्रेष्ठले फोहोर व्यवस्थापनमा आविष्कार र प्रबिधिका बारेमा प्रस्तुतिकरण गरेका थिए ।

No description available.

बी-ग्रुपका कार्यकारी निर्देशक डम्मर सुनारले स्वागत मन्तब्य व्यक्त गरेको कार्यक्रममा एमडिएम फ्रान्सका कार्यक्रम प्रबन्धक वसन्त थापाले फोहोर व्यवस्थापनका क्षेत्रमा गरिरहेका कामहरुबारे जानकारी गराएका थिए । कार्यक्रममा फोहोरको कम प्रयोग, पुनः प्रयोग र प्रशोधित प्रयोगका लागि सचेतनामूलक अभियान सञ्चालनमा जोड दिइएको छ । कार्यक्रममा नेपालगञ्ज उपमहानगरपालिकाका प्रमुख प्रशासकीय अधिकृत शिवप्रसाद रिजाल, वातावरण तथा विपत समिति संयोजक समिरप्रताप सिंह, प्रबक्ता प्रमोद रिजाल लगायत सरोकारवाला उपस्थित थिए । कार्यक्रममा सहजीकरण सञ्चारकर्मी ओविराज आचार्यले गरेका थिए ।

जिआइजेड, एमडिएम फ्रान्स र एएफडीको सहयोगमा बी-ग्रुपले नेपालगञ्ज उपमहानगरपालिकाको समन्वयमा नेपालगञ्जमा पेशागत तथा वातावरणीय स्वास्थ्य सहयोग परियोजना सञ्चालन गरिरहेको छ । डुडुवा र खजुरामा पनि यो परियोजना सञ्चालित छ ।

प्रकाशित मिति: आइतबार, असार १०, २०८० २१:१४

प्रतिक्रिया दिनुहोस्