नेपाल प्रहरीको नयाँ आईजिपी ठाकुर ज्ञवालीलाई बनाउने तयारी

राजनीति

गृहपृष्ठ
राजनीति
नेपाल प्रहरीको नयाँ आईजिपी ठाकुर ज्ञवालीलाई बनाउने तयारी

नेपाल प्रहरीको नयाँ आईजिपी ठाकुर ज्ञवालीलाई बनाउने तयारी

शुक्रबार, माघ २४, २०७६ बागेश्वरी पोस्ट

डीआईजी ठाकुर ज्ञवाली

काठमाडौँ । सरकारले प्रहरी नायब महानिरीक्षक (डीआईजी) ठाकुर ज्ञवालीलाई नेपाल प्रहरीको नेतृत्व दिने तयारी गरेको छ।

वर्तमान प्रहरी महानिरीक्षक सर्वेन्द्र खनालले ३० वर्षे सेवा अवधिका कारण माघ २९ गते अनिवार्य अवकाश पाउँदैछन्। वरियता र वरिष्ठताका आधारमा ज्ञवालीलाई सरकारले नेपाल प्रहरीको नयाँ आईजिपी बनाउने तयारी गरेको एक मन्त्रीले जानकारी दिए। हाल ज्ञवाली प्रदेश १ को प्रहरी प्रमुख हुन् ।

२०४६ साल माघ २९ गते खनालसँगै प्रहरी निरीक्षकबाट सेवा प्रवेश गरेका हालका तीन प्रहरी अतिरिक्त महानिरीक्षक (एआईजी) र १८ जना डीआईजीले पनि एक सातापछि सेवा अवधिका कारण अनिवार्य अवकाश पाउँदैछन्।

यो अवकाशपछि नेपाल प्रहरीमा आईजिपीसँगै तीन एआईजी र १८ डीआईजीको पद पनि रिक्त हुनेछ। खनालको ब्याजले अवकाश पाएपछि ज्ञवाली ज्येष्ठता र वरिष्ठताका आधारमा सबैभन्दा वरिष्ठ डीआईजी हुनेछन्।

ज्ञवालीले २०४७ साल असार २५ गते प्रहरी निरीक्षकबाट सेवा सुरु गरेका हुन्। गृह मन्त्रालयले २०७५ कात्तिकमा गरेको ११ वरिष्ठ प्रहरी उपरिक्षक-एसएसपीहरुको बढुवामा ज्ञवाली खनालको ब्याजीपछि पहिलो नम्बरमा थिए। ज्ञवालीलाई सरकारले नियुक्त गरे उनले करिब पाँच महिना नेपाल प्रहरीको नेतृत्व सम्हाल्नेछन्। त्यसपछि उनले सेवा अवधिका कारण अनिवार्य अवकाश पाउनेछन्।

सरकारले प्रहरी नियमवाली संशाेधन गरेर ३० वर्षे सेवा अवधि हटाउने र खनाललाई नै आईजिपीमा निरन्तरता दिने चर्चा चलेको थियो। तर तत्काल लागु गर्दा प्रहरी बढुवामा ‘जाम’ हुने र संगठनभित्र तीव्र असन्तुष्टी फैलन सक्ने आँकलन सरकारले गरेर त्यसबारे गृहकार्य अगाडि नबढाएको बताइन्छ।

अर्कोतर्फ पाँच महिनाका लागि मात्र नयाँलाई प्रहरी नेतृत्व दिनुभन्दा नियमावली संसोधन गरेर आफैलाई पाँच महिना थप्न पनि खनालले उच्चस्तरका गृह कार्य गरेको स्रोत बताउँछ।

तर सर्वोच्च अदालतले प्रहरीको सेवा अवधी, पदावधी लगायत विषय प्रहरी ऐनमा समावेशमा हुनुपर्ने र नयाँ ऐन ल्याउने तयारी भइरहेकाले त्यसतर्फ पनि गृहकार्य अगाडि नबढाएको ती मन्त्री बताउँछन्।

प्रकाशित मिति: शुक्रबार, माघ २४, २०७६ ०९:१२

प्रतिक्रिया दिनुहोस्