२६ लाखसहित पक्राउ परका कर अधिकृत सापकोटालाई अख्तियारमा बुझाइयो

समाचार

गृहपृष्ठ
समाचार
२६ लाखसहित पक्राउ परका कर अधिकृत सापकोटालाई अख्तियारमा बुझाइयो

२६ लाखसहित पक्राउ परका कर अधिकृत सापकोटालाई अख्तियारमा बुझाइयो

सोमबार, भदौ २५, २०८० बागेश्वरी पोस्ट

नेपालगञ्ज । जिल्ला प्रहरी बाँकेले स्रोत नखुलेको २६ लाख रुपैयाँसहित पक्राउ परेका कर अधिकृत खगेन्द्र सापकोटालाई नेपालगञ्जस्थित अख्तियार दुरुपयोग अनुसन्धान आयोगको कार्यालयमा बुझाएको छ।

आज विहान नेपालगञ्ज विमानस्थलबाट स्रोत नखुलेको २६ लाख रुपैयाँसहित पक्राउ परेका आन्तरिक राजश्व कार्यालय तुलसीपुरका कर अधिकृत सापकोटालाई अख्तियार दुरुपयोग अनुसन्धान कार्यालय नेपालगञ्जमा पठाइएको बाँके प्रहरी प्रवक्ता डीएसपी नारायण डाँगीले जानकारी दिएका छन् ।

स्रोत नखुलेको रकम र कर अधिकृत भएकै कारण भ्रष्टाचारकै रकम भएको हुन सक्ने भन्दै अख्तियारसँगको समन्वय पश्चात अधिकृत सापकोटालाई अनुसन्धानका लागि अख्तियारमा बुझाइएको डीएसपी डाँगीले बताए ।

अब पक्राउ परेका सापकोटाको अनुसन्धान अख्तियारबाटै हुने प्रवक्ता डाँगीले जानकारी दिए । यता फरार रहेका आन्तरिक राजश्व कार्यालय तुलसीपुरका अर्का कर अधिकृत दीपक पौडेलको खोजी कार्य तीब्र पारिएको बाँके प्रहरीले जनाएको छ । दीपक पौडेललाई पनि पक्राउ गरेपछि अख्तियार कार्यालयमै पठाइने प्रहरीले बताएको छ ।

आज नेपालगञ्ज विमानस्थलबाट पौने ९ बजेको श्री एयरको जहाजबाट काठमाडौं उड्न लागेका कर अधिकृत सापकोटालाई विमानस्थल सुरक्षा गार्डका प्रमुख प्रहरी नायब निरीक्षक रविन्द्र बमको टोलीले ब्यागमा राखेर लैजाँदै गरेको स्रोत नखुलेको २६ लाख रुपैयाँसहित पक्राउ गरेको हो ।

सापकोटासँगै काठमाडौं यात्रा गर्न लागेका पौडेल भने बोर्डिङ पास नलिएका कारण विमानस्थलबाट फरार भएका थिए ।

प्रकाशित मिति: सोमबार, भदौ २५, २०८० १२:१५

प्रतिक्रिया दिनुहोस्