बाल सुधार गृहभित्र प्रवेश गर्न सकेन प्रहरी, कैदीबन्दीलाई बाहिरैबाट सम्झाइँदै

समाचार

गृहपृष्ठ
समाचार
बाल सुधार गृहभित्र प्रवेश गर्न सकेन प्रहरी, कैदीबन्दीलाई बाहिरैबाट सम्झाइँदै

बाल सुधार गृहभित्र प्रवेश गर्न सकेन प्रहरी, कैदीबन्दीलाई बाहिरैबाट सम्झाइँदै

शुक्रबार, असोज ५, २०८० बागेश्वरी पोस्ट

नेपालगञ्ज । झडप भएको बाँकेको जयन्दु बालसुधार गृहमा ठूलो संख्यामा प्रहरी परिचालन गरिएको छ । प्रहरीसँगै मानवअधिकारकर्मी र पत्रकारहरुको टोली पनि त्यहाँ पुगेको छ ।

त्यहाँको स्थिति अझै तनावग्रस्त छ । कैदीबन्दीहरुले पत्रकार र अधिकारकर्मीको टोलीलाई देखेपछि झनै बबाल मच्चाएका छन् ।गएराति त्यहाँ रहेका दुई पक्ष कैदीबन्दीबीच झडप हुँदा १ जनाको मृत्यु भइसकेको छ भने १० जना घाइते भएको बाँके प्रहरीले जनाएको छ ।

प्राप्त सूचना अनुसार लागूऔषध सेवन गर्ने र नगर्ने कैदीबन्दीबीच झडप भएको हो । लागूऔषध सेवन गर्ने कैदीबन्दीले सेवन नगर्नेलाई हेप्ने, पिट्ने भएका कारण लागूऔषध सेवन नगर्ने समूह उनीहरुमाथि जाइलागेका हुन् । सोही झडपमा सुलभ केसीको मृत्यु भएको हो भने अन्य १० जनाको नेपालगञ्ज मेडिकल कलेज र भेरी अस्पतालमा उपचार भइरहेको प्रहरीले जनाएको छ ।

घाइते भएका १० जना मध्ये केहीको अवस्था गम्भीर रहेको बताइएको छ । कैदीबन्दीहरुले बाल सुधार गृहलाई पूरै तोडफोड गरेको प्रहरीले जनाएको छ । प्रहरीले स्थितिलाई शान्त बनाउने प्रयास गरिरहेको जनाएको छ ।

बालसुधार गृहमा कैदीबन्दीहरुले बन्दी गृहको गेट नै भित्रबाट लगाएकाले प्रहरीभित्र पस्न सकिरहेको छैन । अवस्था अझै तनावग्रस्त रहेपनि अहिले प्रहरीले उनीहरुलाई सम्झाउने प्रयास गरिरहेको छ । उनीहरुले भित्रबाट आफ्ना माग पूरा गर्नुपर्ने बताएका छन् ।त्यहाँ खटिएका एक प्रहरी निरीक्षकका अनुसार उनीहरुको माग के हो भन्ने थाहा हुन नसकेको र त्यहाँका अलि जान्ने बुझ्ने कैदीबन्दीलाई आएर संवाद गर्न प्रहरीले अनुरोध गरिरहेको जानकारी दिएका छन् ।

प्रकाशित मिति: शुक्रबार, असोज ५, २०८० १०:४७

प्रतिक्रिया दिनुहोस्