चेतन मानन्धर प्रकरणले लियो नयाँ मोड, प्रत्यक्षदर्शी भन्छन्: घटनास्थलमा थिएनन् रिगल

समाचार

गृहपृष्ठ
समाचार
चेतन मानन्धर प्रकरणले लियो नयाँ मोड, प्रत्यक्षदर्शी भन्छन्: घटनास्थलमा थिएनन् रिगल

चेतन मानन्धर प्रकरणले लियो नयाँ मोड, प्रत्यक्षदर्शी भन्छन्: घटनास्थलमा थिएनन् रिगल

बुधबार, असोज २४, २०८० बागेश्वरी पोस्ट

घटना हुँदाका प्रत्यक्षदर्शी बायाँबाट क्रमशः हिमाल नकबाघ, बबी गुरुङ र विनय तामाङ

नेपालगन्ज । आठ वर्ष अघि नेपालगन्जमा दुई समुहको भिडन्तमा ज्यान गुमाएका चेतन मानन्धर प्रकरणले नयाँ रुप लिएको छ । घटनाका प्रत्यक्षदर्शीले चेतन मानन्धरलाई आक्रमण हुँदा योगराज ढकाल (रिगल) उक्त स्थानमा नभएको बताएका छन् । मृतक चेतन मानन्धरका साथीहरुले नै उक्त घटना हुँदा घटनास्थलमा रिगल नभएको खुलासा गरेका हुन् । चेतनमाथि आक्रमण भएपछि उपचारको लागि नेपालगन्ज नर्सिङ होममा लग्ने युवाहरुले नै घटनालाई राजनीतिकरण गर्ने प्रयास गरिएको बताएका छन् ।

चेतनलाई घटनास्थलबाट उपचार गर्न लग्ने व्यक्ति हुन्, नेपालगन्ज–४ बसपार्कका हिमाल नकबाघ । घटनाका प्रत्यक्षीदर्शी हिमालले घटना हुँदा रिगल उक्त स्थानमा नभएको खुलासा गरेका हुन् । उनले भने,‘घटना हुँदा म चेतन दाईको साथमा थिएँ । हाम्रो समूहलाई आक्रमण भएको थियो । तर, त्यतिबेला रिगल दाई त्यहाँ थिएन । राजनीतिक रुपमा रिगल दाईलाई फसाइएको हो । अहिले पनि फसाउने प्रयास गरिँदैछ ।’ सडक निर्माणको ठेक्का र अन्य काममा आफनो वर्चश्व गुम्ने डरका कारण बाँके एमालेका नेताहरुले रिगललाई फसाउन लगानी गरिरहेको उनले आरोप लगाए । नर्सिङ होममा चेतनको उपचारमा पनि लापरबाही भएको हिमालले खुलासा गरे ।

घटनाका प्रत्यक्षदर्शी समेत रहेका चेतनका साथी विनय तामाङले पनि आक्रमण हुँदा रिगल घटनास्थलमा नभएको बताएका छन् । चेतनलाई छबिलाल बस्नेतले आक्रमण गरेको बताउँदै विनयले भने,‘छबिलालको समूहले हामीमाथि आक्रमण गरेको हो । रिगल ढकालले होइन । अहिले जे–जति कुरा आएपनि रिगललाई उनका बिरोधीले फेरि फसाउन खोजेका छन् ।’ अर्का प्रत्यक्षदर्शी नेपालगन्ज धम्बोझीका बबी गुरुङले घटना हुँदा रिगलको त्यहाँ उपस्थिति नरहेको बताएका छन् । राजनीतिक प्रतिशोधका कारण ढकाललाई फसाउने काम भैरहेको भन्दै गुरुङले रिगल निर्दोष भएको बताए । नेपालगन्जको धम्बोझीमा २०७२ साल असार २८ गते बस समितिको विषयलाई लिएर विवाद भएको थियो ।

आठ बर्षको जेल सजायपछि कैद मिनाह गरेर आएका ढकालको बारेमा सामाजिक संजालमा विभिन्न नकारात्मक टिकाटिप्पणी आइरहेका छन् । चेतनकी पूर्व पत्नी भारतीले ढकाललाई सजाय हुनुपर्ने भन्दै काठमाडौंमा प्रदर्शन गर्दै आएकी छिन् । दाङ कारागारमा रहँदा भारतीले आफूसँग ५० लाख रुपैयाँ मागेको ढकालले सार्वजनिक रुपमा बताएका थिए । आर्थिक प्रलोभन, उक्साहट र राजनितिक प्रतिसोध साँध्नको लागि भारतीले बार्गेनिङ गरेको ढकालले आरोप लगाए । मानन्धरको मृत्यु भएपछि भारतीले निमा शेर्पासँग दोस्रो विवाह गरेकी थिइन् ।

आफू दाङ कारागारमै भएका बेला भारतीले छोराको नाममा बार्गेनिङ गरेको ढकालले बताएका छन् । तर, आफूले छोराको सम्पूर्ण पढाई र उच्च शिक्षामा सहयोग गर्ने प्रतिवद्धता जनाएपनि ५० लाख भने दिन नसक्ने बताएको ढकालको भनाई छ । यता भारतीले भने आफूप्रति लगाएका आरोपको खण्डन गर्दै आएकी छिन् ।