जानकीमा बजार अनुगमन तीव्र

समाचार

गृहपृष्ठ
समाचार
जानकीमा बजार अनुगमन तीव्र

जानकीमा बजार अनुगमन तीव्र

बुधबार, असोज २४, २०८० बागेश्वरी पोस्ट

रबिन्द्र घिमिरे/जानकी (बाँके) । जानकी गाउँपालिकामा मंगलबारदेखि बजार अनुगमन गर्ने कार्य भइरहेको छ । जानकी गाउँपालिकाको समन्वयमा वाणिज्य आपूर्ति तथा उपभोक्ता संरक्षण कार्यालय नेपालगन्जले जानकी गाउँपालिकाको वडा नम्बर ६ गनापुरमा रहेका विभिन्न पसलहरुको अनुगमन गरेको छ ।

चाडपर्व लक्षित गरेर जानकी र वाणिज्य कार्यालयले अनुगमनलाई तीव्रता दिएका हुन् । जानकी गाउँपालिकाको न्यायिक शाखाका प्रमुख तथा अनुगमन समिति संयोजक जितबहादुर श्रेष्ठको नेतृत्वमा जिल्ला प्रशासन कार्यालय बाँके, वाणिज्य आपूर्ति तथा उपभोक्ता संरक्षण कार्यालय नेपालगन्ज, गुणस्तर तथा नापतौल कार्यालय नेपालगन्ज, उपभोक्ता हित संरक्षण मंच नेपालगन्जका प्रतिनिधि तथा जानकीका जनप्रतिनिधि एवम् कर्मचारीहरुको संयुक्त उपस्थितिमा गनापुर क्षेत्रमा रहेका करिब २० वटा पसलको अनुगमन गरिएको छ ।

वाणिज्य आपूर्ति तथा उपभोक्ता संरक्षण कार्यालयका नासु डम्बरबहादुर बुढाले अनुगमनका क्रममा धेरैजसो पसलहरुमा म्याद नाघेका वस्तुहरु भेटिएको बताए । कतिपय पसलहरु दर्ता नभएको पाइएको उनले बताए । वाणिज्य आपूर्ति तथा उपभोक्ता संरक्षण कार्यालयका सूचना अधिकारी देविलाल चौलागाईले २० हजार रुपैयाँसम्म तत्काल जरिवाना गरिएको बताए । गनापुरमा रहेको बर्णवाल किराना जनरल स्टोरलाई २० हजार रुपैयाँ जरिवाना गरिएको उनको भनाई छ । उनका अनुसार उक्त पसलमा हार्डवयर तथा मदिरा समेत बिक्री वितरण गर्न राखिएको थियो । आधा भन्दा बढी सामानहरु एक्सपाएर भएको पाइएको र भारतबाट ल्याइएका सामानहरु पनि धेरै रहेको चौलागाईले भनाई छ । साथै उनले मापदण्ड विपरीत सामानहरु बिक्री वितरण गर्न राखिएको बताएका छन् ।

अनुगमन समितिका संयोजक श्रेष्ठले आज मात्रै म्याद नाघेका २० हजार रुपैयाँ बढीका सामानहरु नष्ट गरेको बताए । उनले अनुगमन गर्दा दर्ता नभएका पसलहरुलाई १५ दिनभित्र दर्ता गर्न निर्देशन दिएको बताए । गत वर्ष अनुगमन गरेका केही पसलहरु भने यो पटक धेरै हदसम्म राम्रो भेटिएको उनको भनाई छ ।

प्रकाशित मिति: बुधबार, असोज २४, २०८० २०:२६

प्रतिक्रिया दिनुहोस्