भूकम्पका घाइतेको उपचार व्यवस्थापनका लागि बाँकेमा सबै संयन्त्र क्रियाशील राखिने

समाचार

गृहपृष्ठ
समाचार
भूकम्पका घाइतेको उपचार व्यवस्थापनका लागि बाँकेमा सबै संयन्त्र क्रियाशील राखिने

भूकम्पका घाइतेको उपचार व्यवस्थापनका लागि बाँकेमा सबै संयन्त्र क्रियाशील राखिने

शनिबार, कात्तिक १८, २०८० बागेश्वरी पोस्ट

नेपालगन्ज । बाँकेमा जाजरकोट भूकम्पका घाइतेको उपचार व्यवस्थापनका लागि सबै संयन्त्र क्रियाशील राखिने भएको छ । भेरी अस्पताल परिसरमै बसेको जिल्ला विपद् व्यवस्थापन समितिको बैठकले भूूकम्पबाट भएको मानवीय तथा भौतिक क्षतीलाई मध्यनजर गरी आवश्यक प्रतिकार्यका लागि सवै संयन्त्रलाई क्रियाशील राख्ने निर्णय गरेको हो ।

भूूकम्पका कारण घाइते विरामीको उपचारका लागि भेरी अस्पताललाई डेडिकेटेड अस्पतालको रुपमा स्थापना गर्ने निर्णय गरिएको छ । साथै नेपालगञ्ज मेडिकल कलेज लगायत सवै अस्पताललाई तयारी अवस्थामा राख्ने निर्णय पनि गरिएको प्रमुख जिल्ला अधिकारी श्रबणकुमार पोख्रेलले जानकारी दिए ।

विरामीका लागि रगतको अभाव हुन नदिन सबै स्वयंसेवकलाई रक्तदानका लागि अनुरोध गर्ने निर्णय पनि गरिएको छ । भूूकम्पवाट प्रभावित क्षेत्र तथा मानवीय सहयोगका लागि अस्पतालहरुमा समन्वय गर्न स्वास्थ्य कार्यालय बाँकका जनस्वास्थ्य अधिकृत नरेश श्रेष्ठ र समन्वय तथा राहत व्यवस्थापनका लागि प्रशासकीय अधिकृत रामकुमार सोनकर र सूचना व्यवस्थापन अधिकृत रुपन ज्ञवालीलाई फोकल पर्सन तोक्ने निर्णय भएको पोख्रेलले बताए । राँझा विमानस्थलमा रहेको मानवीय सहायता कक्षमा जिल्ला विपद् व्यवस्थापन समिति बाँकेको राहत भण्डारण गरी परिचालन गर्ने निर्णय गरिएको छ ।

नेपालगञ्ज उपमहानगरपालिकाको तर्फवाट तत्काल राहत स्वरुप रु. ४ लाख बरावरको खाद्यान्न र त्रिपाल, झुल, पिफर्म लगायत १०० जना परिवारको लागि पुग्ने सामग्री साथै मेडिकल टिम परिचालन गर्ने निर्णय भएको सूचना व्यवस्थापन अधिकृत ज्ञवालीले बताए । यस्तै कोहलपुर नगरपालिकाको तर्फवाट तत्काल राहत स्वरुप रु. २ लाख बरावरको खाद्यान्न र औषधी उपलव्ध गराइने भएको छ । राप्तीसोनारी गाँउपालिकाको तर्फवाट रु. १ लाख वरावरको ‍औषधि सामग्री र रु. ५० हजार बरावरको खाद्यान्न र १ जना चिकित्सक सहितको टिम परिचालन गरिने भएको छ । यस्तै २० थान कम्मल र २० थान त्रिपाल सहयोग गर्ने भएको छ । खजुरा गाउँपालिकाको तर्फवाट रु. ३ लाख बरावरको औषधि सहयोग गर्ने भएको छ । नेपाल रेडक्रस सोसाइटी बाँकेको समन्वयमा केन्द्रिय कार्यालयमार्फत जाजरकोट र पश्चिम रुकुममा ६०० थान कम्मल, त्रिपाल र पिफर्म उपलव्ध गराउने निर्णय गरिएको छ । जिल्ला विपद् व्यवस्थापन समिति बाँकेको तर्फवाट तत्कालै १० थान टेन्ट, ५० थान त्रिपाल र ५० थान कम्मल उपलव्ध गराइने भएको छ ।

प्रकाशित मिति: शनिबार, कात्तिक १८, २०८० १३:२६

प्रतिक्रिया दिनुहोस्