लायन्सद्वारा भूकम्प प्रभावितलाई १७ लाखको आपतकालीन राहत वितरण

समाचार

गृहपृष्ठ
समाचार
लायन्सद्वारा भूकम्प प्रभावितलाई १७ लाखको आपतकालीन राहत वितरण

लायन्सद्वारा भूकम्प प्रभावितलाई १७ लाखको आपतकालीन राहत वितरण

दोस्रो चरणमा १ करोडको राहत प्याकेज दिइने

बुधबार, कात्तिक २२, २०८० बागेश्वरी पोस्ट

नेपालगञ्ज । लायन्स क्लब इन्टरनेशनलले जाजरकोटका भूकम्प प्रभावितलाई १७ लाख बराबरको आपतकालीन राहत वितरण गरेको छ । लायन्स क्लब इन्टरनेशनल डिष्ट्रिक्ट ३२५ 'एन' ले आज नेपालगन्जमा पत्रकार सम्मेलन गरेर नलगाड नगरपालिका वडा नम्बर १ को चिउरी वस्ती, भेरी नगरपालिका वडा नम्बर १ को राउत गाउँ, पिपे, रिम्रा र कोल्चौरमा ५ सय जनालाई १७ लाख बराबरको त्रिपाल, बल्यांकेट, चामल, म्याट, खाने तेल, दाल, पिठो, नुन, फ्रुटी, चिउरा, भुजा, बिस्कुट, पी-फर्म, टोपी, जुत्ता, चप्पल, औषधि आदि वितरण गरेर फर्किएको जनाएको छ ।

भूकम्प आएको भोलिपल्टै कार्तिक १८ गते पहिलो चरणमा तत्कालै नेपालगन्जबाट डिष्ट्रिक्ट ३२५ 'एन' का डिष्ट्रिक्ट गभर्नर मुकुट ढकाल र सुर्खेतबाट डिष्ट्रिक्ट एकज्यूटिभ चिफ लायन टिकाराम चपाईको नेतृत्वमा गएको टोलीले १७ लाख बराबरको आपतकालीन राहत वितरण गरेको हो । यस्तै कार्तिक २१ गते डिष्ट्रिक्ट ३२५ 'के' को टिम जाजरकोट जिल्लाको नलगाड नगरपालिका वडा नम्बर ३ मा १ सय २५ जनाको लागि त्रिपाल र बल्यांकेट लिएर प्रस्थान गरेको ढाकालले बताए । बुधबार पनि डिष्ट्रिक्ट ३२५ 'एम' बाट स्याङ्जाको टिम पश्चिम रुकुमको आठविसकोट नगरपालिका क्षेत्रमा १०० परिवारको लागि आवस्यक सामग्री लिएर गएको जनाइएको छ । नेपाल सरकारको एकद्वार प्रणाली नीति अनुरुप समग्र नेपालभरिका लायन्सहरुको सहयोगलाई एकतृत गरी डिष्ट्रिक्ट ३२५ 'एन' को नेतृत्वमा वितरण गर्ने योजना रहेको ढकालले जानकारी गराए ।

लायन्सले अब तिहार लगत्तै दोस्रो चरणको राहत वितरण गर्ने बताएको छ । १ करोड बराबरको राहत प्याकेज नै बनाएर कम्तीमा एक परिवारलाई एक महिनासम्म पुग्ने आवश्यक सम्पूर्ण राहत सामग्री वितरण गर्ने योजना लायन्सको छ ।

प्रकाशित मिति: बुधबार, कात्तिक २२, २०८० १८:२२

प्रतिक्रिया दिनुहोस्