बाँकेमा किसानले उत्पादन गरेको धान खरिद शुरु

समाचार

गृहपृष्ठ
समाचार
बाँकेमा किसानले उत्पादन गरेको धान खरिद शुरु

बाँकेमा किसानले उत्पादन गरेको धान खरिद शुरु

बुधबार, मंसिर ६, २०८० बागेश्वरी पोस्ट

नेपालगञ्ज । बाँकेमा किसानले उत्पादन गरेको धान आजदेखि खरिद शुरु भएको छ । खाद्य व्यवस्था तथा व्यापार कम्पनी लिमिटेड नेपालगञ्जले किसानले उत्पादन गरेको धान आजदेखि खरिद गर्न शुरु गरेको हो ।

नेपालगञ्ज सडक डिभिजन कार्यालय नजिकै रहेको कम्पनीको प्राङ्गणमा धान बिक्री गर्न आएका पहिलो किसान बाँकेको जानकी गाउँपालिका–५ का रुपबहादुर कार्कीलाई स्वागत गरेर धान खरिद शुरु गरेको लिमिटेड नेपालगञ्जका प्रमुख रामशरण लामिछानेले बताए ।

पालिकाको सिफारिस लिएर आएका किसानको धान परीक्षण गरेर एक जना किसानबाट बढीमा ४० क्विन्टल धान खरिद गर्न शुरु गरिएको छ । आज दिनभर छ जना किसानबाट दुई सय ३० क्विन्टल धान खरिद गरिएको छ ।

यस वर्ष नेपालगञ्जमा ५१ हजार क्विन्टल धान खरिद गर्ने लक्ष्य लिइएको छ । ३३ हजार क्विन्टल मोटा र १८ हजार क्विन्टल मध्यम धान खरिद गर्न लागिएको कार्यालयले जनाएको छ । कार्यालय प्रमुख लामिछानेले भने, ‘पालिकाको सिफारिस लिएर आउने किसानलाई पालो तोकेर धान किन्ने दिनमा बोलाउँछौँ । यसो गर्दा विगतको जस्तो लामो लाइन लागेर किसानले दुःख पाउने अवस्था यो वर्ष हुने छैन ।’ गैरकिसानले धान बेच्ने अवस्था नआओस् भन्नका लागि वास्तविक किसानको पहिचानका लागि पालिकाबाट सिफारिस अनिवार्य गरिएको छ ।

सरकारले मोटा धानको मूल्य प्रतिक्विन्टल तीन हजार एक सय ९८ र मध्यम धानको मूल्य प्रतिक्विन्टल तीन हजार तीन सय ६२ रुपैयाँ कायम गरेकोले त्यही भाउमा खाद्य व्यवस्था कम्पनीले धान खरिद गरेको छ ।

यस वर्ष तोकिएको ५१ हजार क्विन्टल धान खरिद नभएसम्म खरिद जारी राखिने लिमिटेड नेपालगञ्जले जनाएको छ । गएको वर्ष २५ हजार क्विन्टल धान खरिद गर्ने लक्ष्य निर्धारण गरेको कम्पनीले विभिन्न कारण र समस्याले गर्दा नौ हजार क्विन्टल मात्रै खरिद गर्न सकेको थियो ।

यस वर्ष किसानको सहजताका लागि १० देखि १५ जना सम्मलाई कुपन दिएर पालो पर्ने दिनमा बोलाउने व्यवस्था मिलाइएको छ । रासस

प्रकाशित मिति: बुधबार, मंसिर ६, २०८० २०:४५

प्रतिक्रिया दिनुहोस्