कांग्रेस कोहलपुर नगर उपसभापति चुन्न आज मतदान

राजनीति

गृहपृष्ठ
राजनीति
कांग्रेस कोहलपुर नगर उपसभापति चुन्न आज मतदान

कांग्रेस कोहलपुर नगर उपसभापति चुन्न आज मतदान

प्रदेश क्षेत्र उपसभापतिमा जागेश्वर निर्विरोध

सोमबार, मंसिर ११, २०८० गौरब गिरी

नेपालगन्ज । नेपाली काँग्रेस कोहलपुर नगरपालिका नगर उपसभापति पदका लागि आज मतदान हुँदैछ । उपसभापति सुशिल सापकोटाले राजिनामा दिएर विदेश गएपछि उक्त पद रिक्त थियो । नेपाली काँग्रेस कोहलपुर नगर सभापति वीरेन्द्र कुमार शाहले रिक्त पदपूर्तिका लागि निर्वाचन हुन लागेको जानकारी दिए । उपसभापति पदमा तीन जनाको उम्मेदवारी परेको छ ।

ऋषिराज सापकोटा, युवक ओली र चेतकान्त भट्टराईबीच प्रतिस्पर्धा हुने भएको हो । सापकोटा जिल्ला सदस्यमा पराजित भएका थिए भने भट्टराई पनि तत्कालीन उपसभापति सुशिल सापकोटासँग पराजित भएका थिए । भट्टराई चार महिना अघि नेपाल प्रेस युनियन बाँकेको १२ औं अधिवेशनमा पनि अध्यक्ष पदमा पराजित भएका थिए । ओली भने पहिलो पटक पदाधिकारीमा भिड्न लागेका हुन् ।

निर्वाचन अधिकृत चुडामणि ढकालका अनुसार सापकोटाले दोर्णबहादुर जैशीको प्रस्तावक र गणेश बहादुर थापाको समर्थकमा उम्मेदवारी दर्ता गराएका छन् । यसैगरी ओलीले रामगोपाल तमौलीको प्रस्तावक र बेगबहादुर ओलीको समर्थकमा उम्मेदवारी दर्ता गराए । भट्टराईले भने विश्वराज भण्डारीको प्रस्तावक र गौरव रावलको समर्थकमा उम्मेदवारी दर्ता गराएको निर्वाचन अधिकृत ढकालले बताए । उपसभापति चुन्नका लागि ३२१ जनाले मतदान गर्नेछन् । कोहलपुर नगरपालिकाका १५ वडाका क्षेत्रीय प्रतिनिधिहरुले मत हाल्ने छन् ।

कोहलपुर नगरपालिका वडा नं. १, १२ र १३ मा १७–१७ जना, वडा नं.२ र ६ मा २०–२०, वडा नं.३, ४, ५, ९ र १५ मा १९–१९ जना, वडा नं.७ र १४ मा १८–१८ जना, वडा नं.११ मा २९, वडा नं.८ मा ३१ र वडा नं. १० मा ३९ जना मतदाता छन् । मतदान आज सोमवार विहान १० बजेदेखि दिउँसो ३ बजेसम्म पार्टी कार्यालयमा चल्ने पनि निर्वाचन अधिकृत ढकालले बताए ।

यसैबीच नेपाली काँग्रेस बाँके क्षेत्र नं.१ प्रदेश ‘ख’ को सभापतिमा भने जागेश्वर चौधरी निर्विरोध भएका छन् । उक्त पदमा चौधरीको मात्र उम्मेदवारी परेपछि उनी निर्विरोध भएको निर्वाचन समितिले जनाएको छ । नेपाली काँग्रेस बाँके क्षेत्र नं.१ प्रदेश ‘ख’ का उपसभापति डा.राजकुमार सुवेदी राष्ट्रिय स्वतन्त्र पार्टीमा प्रवेश गरेपछि उक्त पद रिक्त रहेको थियो ।

प्रकाशित मिति: सोमबार, मंसिर ११, २०८० ०७:००