पुरुष पनि घरेलु हिंसामा, प्रहरीमा ४० उजुरी

समाचार

गृहपृष्ठ
समाचार
पुरुष पनि घरेलु हिंसामा, प्रहरीमा ४० उजुरी

पुरुष पनि घरेलु हिंसामा, प्रहरीमा ४० उजुरी

मंगलबार, मंसिर २६, २०८० बागेश्वरी पोस्ट

नेपालगन्ज । बाँकेमा पुरुष पनि घरेलु हिंसामा परेको जनाउँदै न्यायका लागि प्रहरी कार्यालयमा उजुरी दिन पुगेका छन् । चालू आर्थिक वर्षको साउनदेखि हालसम्म ४० जना पुरुषले न्यायका लागि उजुरी दिएको जिल्ला प्रहरी कार्यालय महिला बालबालिका तथा ज्येष्ठ नागरिक सेवा केन्द्र प्रमुख प्रहरी निरीक्षक महेश्वरी विष्टले जानकारी दिइन् ।

उनका अनुसार पुरुषको तर्फबाट पनि हिंसामा परेको उजुरी आइरहेका छन् । तर, पुरुषले दिने उजुरीको तुलनामा महिलाको सङ्ख्या अत्याधिक छ । “अधिकांश हिंसामा परेको उजुरी महिलाको तर्फबाट आउने गरेका छन्”, प्रहरी निरीक्षक विष्टले भनिन्, “कतिपय अवस्थामा पुरुषको तर्फबाट पनि उजुरी आइरहेका छन्, हामीले आवश्यक कारबाही गरिरहेका छौँ ।”

जिल्ला प्रहरी कार्यालय बाँकेको तथ्याङ्क अनुसार बाँकेमा पछिल्लो तीन वर्षमा घरेलु हिंसाका २ हजार ७ सय ५० वटा उजुरी दर्ता भएका छन् । अधिकांश घटनामा महिला पीडित रहेका छन् । अहिले पुरुषले समेत आफूमाथि हिंसा भएको भन्दै उजुरी दिन थालेका छन् ।

जिल्ला प्रहरी कार्यालय बाँकेमा आर्थिक वर्ष २०७७/७८ मा ७ सय ३८, २०७८/७९ मा ८ सय ८९, २०७९/८० मा ८ सय ८५ र चालू आर्थिक वर्षको साउनदेखि हालसम्म घरेलु हिंसामा परेको जनाउँदै ३ सय ३२ वटा उजुरी परेका छन् । जिल्ला प्रहरी कार्यालय बाँकेका प्रवक्ता प्रहरी नायब उपरीक्षक नारायण डाँगीले हिंसामा परेको भन्दै उजुरी दिने महिलामा बयान फिर्ता गरी उजुरी फिर्ता हुने प्रवृत्ति पनि देखिएको बताए ।

“निवेदन दिइसकेपछि कतिपय निवेदनकर्ता सम्पर्कमा आउँदैनन् । प्रतिशोध साँध्नका लागि उजुरी दिने र त्यसपछि वास्तै नगर्ने प्रवृत्ति समेत बढ्दै गएको छ”, उनले भने, “उजुरी परेपछि हिंसासँग जोडिएका घटनालाई सुक्ष्मरूपले गम्भीरतापूर्वक अनुसन्धान गर्ने गरिएको छ ।” रासस

प्रकाशित मिति: मंगलबार, मंसिर २६, २०८० १४:४०

प्रतिक्रिया दिनुहोस्