आमा सेमिनार: जहाँ थामिएनन् आँसु

समाचार

गृहपृष्ठ
समाचार
आमा सेमिनार: जहाँ थामिएनन् आँसु

आमा सेमिनार: जहाँ थामिएनन् आँसु

बिहीबार, मंसिर २८, २०८० बागेश्वरी पोस्ट

नेपालगन्ज । त्यो सेमिनार जहाँ नरुने र भावुक नहुने कोही थिएन । आँसुलाई माध्यम बनाउँदै मनको भावनाहरु पोखिरहेका थिए, उपस्थित सबैले । कतिको आँखाबाट बगिरहेको थियो, आत्माग्लानीको आँसु, कोहीको आँखामा सम्मान र ममता भरिएको आँसु, त कसैको आँखामा थिए मातापितासँगको विछोडका आँसु । सबैको आखाँबाट बगेका आँसु एउटै भएपनि आँसुका भावहरु भने फरक फरक थिए ।

मानव सेवा आश्रमले नेपालगन्जमा आयोजना गरेको आमा सेमिनारमा प्रस्तुत भएका आमाको माया, ममता, त्याग र पीडा सम्बन्धि प्रस्तुतिले कतिपयले आफूले जानेर वा अन्जानमा आमाप्रति गरेको व्यबहारलाई सम्झिएर आत्माग्लानीको आसुँ बगाइरहेका थिए भने कतिले मातापितासँगको विछोड सम्झेर । कतिपय भने मातापिताको त्याग र समर्पण सम्झेर सम्मानले शिर झुकाएर रोइरहेका थिए । कतिजना एक अर्कोलाई अंकमाल गर्दै रोइरहेका थिए । आफ्नो मातृत्व र मातृभूमिप्रति सद्भाव र सम्मानले भरिएको थियो, उपस्थित सबैको आँखा मन ।

आमा सेमिनारमा बाक्लो उपस्थिति थियो । कुनै धमाकेदार र भड्किलो प्रचारबिना पनि हल पूरै भरिएको थियो । शान्त र व्यबस्थित वाताबरणमा भएको बिल्कुल फरक कार्यक्रम, जहाँ मानवीय संवेदनाले भरिएका र सामाजिक रुपान्तरणको अभ्यासमा लागेका मनहरुको जमघट भएको थियोे ।

उक्त कार्यक्रममा विगत १५ बर्ष देखि राष्ट्रिय तथा अन्तर्राष्ट्रिय स्तरमा विभिन्न सन्देशमूलक र उत्प्रेरणात्मक कार्यक्रमहरुमा प्रस्तुति दिइसकेका मानवसेवा आश्रमका संस्थापक तथा केन्द्रिय अध्यक्ष रामजी अधिकारीले आमा सेमिनारको प्रस्तुति गरेका थिए । आमाको महिमा, पीडा र त्यागबारे उहाँको प्रस्तुतिले उपस्थित सबैको आँखा रसाएका थिए ।

"पछिल्लो समय आधुनिक जीवनशैलीसँगै नेपालको मौलिक संस्कृति र संस्कारमा समेत विकृति हावी हुँदै गएको छ । आजीवन सन्तानका लागि मरिमेट्ने अभिभावकलाई जीवनको उत्तराद्र्धमा अपहेलित गरी घरबाट बाहिर छोड्ने कुसंस्कार मौलाउँदै गएको छ । यस्तो विषम परिस्थितिमा मातृत्व र मातृभूमीप्रतिको दायित्वबोध गराउन मानवसेवा आश्रमले आमा सेमिनार गर्दै आएका छौं," बाँके जिल्ला संयोजक उर्बिन सापकोटाले भने । मानवता, राष्ट्रियता, परोपकार, राष्ट्र प्रेम र आफूलाई जन्मदिने माता पिता र मातृभूमिप्रतिको महत्व बोध गराई, प्रेम, सद्भाव र करुणालाई जन–जनमा पु¥याएर संस्कारयुक्त र सभ्य समाज निर्माण गर्नु नै कार्यक्रमको उद्देश्य रहेको सापकोटाले बताए । समाजमा सकारात्मक सन्देश प्रभाव गर्दै कसैले पनि सडकपेटीमा वेवारिसे जीवन बिताउन पर्ने परिस्थिति सिर्जना नै नहोस् भन्ने आयोजकको उद्देश्य रहेको छ ।

मानवसेवा आश्रमले २०८२ सालभित्र सहयोगापेक्षी सडकआश्रित मानवमुक्त राष्ट्र नेपाल निर्माणको लक्ष्य लिएको छ । सोही लक्ष्य अनुरुप मानवसेवा आश्रम २०६९ सालदेखि नै देशव्यापीरुपमा संचालित छ । नेपालगंजमा २०७९ बैशाखदेखि सडकपेटी र सार्वजनिक स्थलहरुमा कष्टपूर्ण जीवन विताउन विवश अनाथ, अपाङ्ग, अशक्त, असहाय, शारिरीक तथा मानसिकरुपमा अति कमजोर मानवहरुको उद्धार, उपचार, पालनपोषण एवं पारिवारिक पुनर्मिलनको सेवामा समर्पित हुँदै आइरहेको छ । मुठीदानबाट संचालित आश्रमको नेपालगन्ज शाखामा अहिले ५० जनाले आश्रय लिइरहेका छन् । त्यसमध्ये ३५ जना पुरुष १२ जना महिला र ३ जना बालबालिका रहेका छन् ।

प्रकाशित मिति: बिहीबार, मंसिर २८, २०८० १५:५२

प्रतिक्रिया दिनुहोस्