जोखिमपूर्ण यात्रामा निस्केका ५०९ जना नेपालगन्ज नाकाबाट फिर्ता

समाचार

गृहपृष्ठ
समाचार
जोखिमपूर्ण यात्रामा निस्केका ५०९ जना नेपालगन्ज नाकाबाट फिर्ता

जोखिमपूर्ण यात्रामा निस्केका ५०९ जना नेपालगन्ज नाकाबाट फिर्ता

आइतबार, पुस १५, २०८० बागेश्वरी पोस्ट

नेपालगन्ज । माइती नेपाल नेपालगञ्जले एक वर्षको अवधिमा भारत तथा तेस्रो मुलुक जानका लागि जोखिमपूर्ण यात्रामा निस्केका ५०९ जनालाई नाकाबाट फिर्ता पठाएको छ । सन् २०२३ मा माइती नेपालले नेपालगञ्ज नाकाबाट विभिन्न जिल्लाबाट भारत तथा तेस्रो मुलुक जान थालेका ५०९ जना महिला तथा बालबालिकालाई नाकाबाट फिर्ता पठाएको हो ।

माइती नेपालले आज नेपालगञ्जमा सञ्चारकर्मीसँग अन्तरक्रिया गर्दै उक्त तथ्यांक सार्वजनिक गरेको हो । माइती नेपाल नेपालगञ्जका संयोजक केशव कोइरालाले जोखिमपूर्ण यात्रामा निस्केका र नाकाबाट फिर्ता पठाइएका ५०९ जनामध्ये १८ वर्षमुनिका बालिका १८२ जना रहेको जानकारी दिए । कोइरालाका अनुसार जोखिमपूर्ण यात्राबाट घर फिर्ता पठाइएकामा बाँकेका ८२ जना, बर्दियाका ५३ जना, सुर्खेतका ६० जना, दाङका ५५ जना, सल्यानका ३६ जना, दैलेखका ३० जना, जाजरकोटका २७ जना, रुकुमका २० जना, रोल्पाका १९ जना, कैलालीका १६ जना, जुम्लाका १४ जना रहेका छन् ।

यो नाकाबाट पूर्वी जिल्लाका महिला तथा बालबालिकालाई समेत भारत तथा तेस्रो मुलुकमा लैजाने गरिन्छ । जसमा चितवनका ७ जना, सिन्धुपाल्चोकका ३ जना, मकवानपुरका ५ जना, सिन्धुलीका २ जना, तनहुँका एक जना, अर्घाखाँचीका एक जना, ताप्लेजुङका २ जना, धादिङका ८ जना, इलामका एक जना, सुनसरीका २ जना, गुल्मी र स्याङ्जाका एक/एक जनालाई फिर्ता पठाइएको छ ।

माइती नेपाल नेपालगञ्जमा यो वर्ष ६ सय ६२ वटा खोजतलास तथा उद्धारका लागि निवेदन परेको छ । त्यसमा २ सय ७८ जना फेला परेका छन् । खोजतलासको निवेदनमा २ सय ८४ जना १८ वर्षमुनिका बालिका रहेका छन् । संयोजक कोइरालाले सामाजिक सञ्जालको दुरुपयोग गरेर महिला तथा बालबालिका जोमिखपूर्ण यात्रामा निस्किने घटना बढेको बताए । उनले सामाजिक सञ्जालको दुरुपयोग रोक्नका लागि स्कूल र कलेज तथा जोखिमपूर्ण यात्रामा बढी निस्केका गाउँटोलमा गएर सचेतनामूलक कार्यक्रमहरु गरिरहेको बताए ।

प्रकाशित मिति: आइतबार, पुस १५, २०८० १९:४८

प्रतिक्रिया दिनुहोस्