भूकम्प प्रभावित महिलालाई एक हजार थान राहत सामग्री

समाचार

गृहपृष्ठ
समाचार
भूकम्प प्रभावित महिलालाई एक हजार थान राहत सामग्री

भूकम्प प्रभावित महिलालाई एक हजार थान राहत सामग्री

शुक्रबार, पुस २७, २०८० बागेश्वरी पोस्ट

नेपालगञ्ज । जाजरकोटका भूकम्प प्रभावित गर्भवती, सुत्केरी तथा सीमान्तकृत महिलालाई एक हजार थान राहत सामग्री पठाइएको छ । सांसद डा. आरजु राणा देउबाले आज नेपालगञ्जमा आयोजित एक कार्यक्रममा नेपाल तरुण दलका अध्यक्ष विद्वान गुरुङलाई जाजरकोटमा पुगेर तत्काल ती सामग्री भूकम्प प्रभावित गर्भवती, सुत्केरी तथा सीमान्तकृत महिलालाई वितरण गर्ने गरी हस्तान्तरण गरेकी हुन् ।

डिग्निटी किट एवम् पौष्टिक तथा पोषिलो आहारसहितको एक हजार थान झोला भूकम्प प्रभावित गर्भवती, सुत्केरी तथा सीमान्तकृत महिलालाई वितरण गरिनेछ । १८ प्रकारको सामग्री भएको किटको संख्या ५ सय थान र १५ प्रकारको सामग्री भएको किटको संख्या ५ सय थान छ । वितरण गरिने सामग्रीहरुमा ज्याकेट तथा टाउजर, उलनको मोजा, स्यानेटरी प्याड, बच्चाको ब्ल्यांकेट, बच्चाको कपडा, म्याक्सी, कटनको तौलिया, भित्री बस्त्र, टुथ ब्रस, टुथ पेष्ट, नेल कटर, काइँयो, सरफ, सेम्फु, नुहाउने साबुन, लुगा धुने साबुन र पोषणयुक्त खानेकुरा छन् ।

सांसद डा. देउबाको सचिवालय, ग्रामीण महिला विकास तथा एकता केन्द्र ९रुडुक० काठमाडौं, सुरक्षित मातृत्व सञ्जाल महासंघ काठमाण्डौ, पपुलेसन कनेक्सन अमेरिका, नेपाल स्वास्थ्य फुड इण्डष्ट्रीज मोरङ र हिमालयन रि इन्स्योरेन्स प्रालि काठमाण्डौले राहत सामग्री जुटाएका हुन् ।

राहत सामग्री हस्तान्तरण कार्यक्रममा डा. देउबाले विपदका बेला सक्दो सहयोग गर्नुपर्दछ भन्ने मनसायका साथ राहत सामग्री सहयोग गरेको बताइन् । गर्भवती, सुत्केरी र सीमान्तकृत महिलाहरुलाई चिसोमा झनै समस्या भइरहेको भन्ने सुनेर उनीहरुको सहजताका लागि राहत पठाउन लागेको बताइन् ।

तरुण दलका अध्यक्ष गुरुङले यी राहत सामग्री यथाशक्य चाँडो लक्षित बर्गसम्म पुर्याउने बताए । उनले तरुण दलले जाजरकोटमा भूकम्प प्रभावितका लागि ७२ वटा टहरा बनाएको जानकारी दिए । कार्यक्रममा नेपाली कांग्रेसका केन्द्रिय सदस्य योगेन्द्र चौधरी, लुम्बिनी प्रदेशका उद्योग मन्त्री रोज राणा, लुम्बिनी प्रदेशका सांसदहरु बादशाह कुर्मी, माया पुन, मिना सिद्दिकी लगायत उपस्थित थिए ।

प्रकाशित मिति: शुक्रबार, पुस २७, २०८० १७:४५

प्रतिक्रिया दिनुहोस्