दाङ बस दुर्घटना:मृतक १२ मध्ये ८ जनाको सनाखत

समाचार

गृहपृष्ठ
समाचार
दाङ बस दुर्घटना:मृतक १२ मध्ये ८ जनाको सनाखत

दाङ बस दुर्घटना:मृतक १२ मध्ये ८ जनाको सनाखत

शनिबार, पुस २८, २०८० बागेश्वरी पोस्ट

नेपालगन्ज । दाङको भालुवाङमा गएराती बस दुर्घटना हुँदा मृत्यु भएका १२ जनामध्ये ८ जनाको सनाखत भएको छ । मृत्यु हुनेमा मकवानपुर हेटौँडाका ३९ वर्षीय सौरभ विष्ट, काठमाण्डौको चन्द्रागिरि नगरपालिका–५ का ६५ वर्षीय ताराकान्त पाण्डे, भारत उत्तर प्रदेशका ३१ वर्षीय मुने, जुम्लाका ४० वर्षीय मुनबहादुर रावत, बाँकेका २० वर्षीय रामबहादुर हरिजन, रुकुमका २५ वर्षीय दीपक कामी, भारत विहारका ६७ वर्षीय देवेन्द्र राय तथा बाँकेको नेपालगञ्जकी ६० वर्षीया कुसुम बस्नेत रहेको दाङका प्रहरी प्रमुख प्रहरी उपरीक्षक रामबहादुर केसीले जानकारी दिए । अन्य ४ जनाको सनाखत छैन ।

नेपालगञ्जबाट काठमाण्डौ जाँदै गरेको भे १ ख ३९१२ नम्बरको रात्रि बस गएराती भालुवाङको राप्ती पुलबाट खसेको थियो । दुर्घटनामा अन्य २३ जना यात्रु घाइते भएका छन् । घाइतेमध्ये ८ जनाको नेपालगन्ज मेडिकल कलेज शिक्षण अस्पताल कोहलपुरमा उपचार भइरहेको छ । अन्य घाइतेको बुटवल र भालुवाङमा उपचार भइरहेको छ । बसका चालक सल्यान घर भएका २८ वर्षीय लालबहादुर नेपालीलाई पक्राउ गरिएको प्रहरीले जनाएको छ । बस दुर्घटनाको कारण खुलिसकेको छैन ।

प्रकाशित मिति: शनिबार, पुस २८, २०८० ०८:०९

प्रतिक्रिया दिनुहोस्