भोकै बस्न बाध्य आमाछोरीलाई वर्ष दिन पुग्ने खाद्यान्न

समाचार

गृहपृष्ठ
समाचार
भोकै बस्न बाध्य आमाछोरीलाई वर्ष दिन पुग्ने खाद्यान्न

भोकै बस्न बाध्य आमाछोरीलाई वर्ष दिन पुग्ने खाद्यान्न

शनिबार, माघ ६, २०८० बागेश्वरी पोस्ट

नेपालगञ्ज । बाँकेको खजुरा गाउँपालिका वडा नम्बर २ एल गाउँ बस्ने दृष्टिविहिन देवीमाया मगर परियार र उनको छोरी केही दिनदेखि भोकै बस्न बाध्य थिए । चियाको भरमा दिन कटाउन बाध्य देवीमायाले घरमा खान केही अन्न छैन भनेर धेरैलाई हारगुहार गरिन् तर सहयोग गर्ने कोही नभेट्दा निराश बनेकी उनी खबरगञ्ज मिडियाको सम्पर्कमा आएकी थिइन् ।

नागरिकले खान नपाएर छट्पटिएको स्थानीय सरकार वडा कार्यालयले थाहा पाएर पनि नपाएको जस्तो गरेपछि देवीमायाले मिडिया गुहारेकी हुन् । खबरगञ्जले तत्कालै देवीमायाको घरमा पुगेर रिपोर्टिङ्ग गरी उनको घरमा खान केही नभएको र साहरा दिने पनि कोही नहुँदा परेको समस्याका बारेमा शुक्रबार साँझ भिडियो प्रशारण गरेको थियो ।

भिडियो प्रशारण भएको भोलिपल्ट नै देवीमायाको घरमा वर्षभरी पुग्ने खाद्यान्न पुगेको छ । हाल अमेरिका बस्ने खजुरा गाउँपालिका वडा नम्बर ४ डि गाउँ निवासी समाजसेवी लिलबहादुर थापाले खान समेत नपाएर छट्पटाएको पीडा देखेर तत्कालै एक वर्षसम्म पुग्ने खाद्यान्न सामग्री प्रदान गरेका हुन् । देशका विभिन्न स्थानहरुमा दिनदुःखीहरुको घरमा चुलो बाल्न सहयोग गरिरहने थापाले खबरगञ्जका प्रवन्ध निर्देशक तथा सञ्चालक खगेन्द्र दाहालमार्फत देवीमायाको भान्सामा वर्षभरी चुल्लो बल्ने गरी सहयोग प्रदान गरेका हुन् ।

दुई वर्ष अघि जनता आवास कार्यक्रममार्फत झुप्रो घरबाट बस्न लायक घर पाएकी दृष्टिविहिन देवीमायालाई समस्या थियो त खान, लाउन र छोरी पढाउन । अहिले उनको लागि पहिलो प्राथमिकताको रुपमा खानु नै थियो । खान नपाएकी उनको घरमा अघिल्लो दिन रिपोटिङ्गमा आएका सञ्चारकर्मीले भोलिपल्टै यति धेरै सामग्री घरमै ल्याउँदा देवीमायालाई सुरुमा विश्वास लागेको थिएन । पछि आफैं सबै सामानहरु छाम्दै चिन्न थालिन् । उनको आँखाबाट आँशु रोकिएनन् ।

दृष्टिविहिन देवीमायाका श्रीमान ८ वर्ष अघि भारत कमाउन जान्छु भनेर गएपछि फर्केर आएका छैनन् । श्रीमान ज्युउँदा छन् या छैनन्, उनले थाहा पाउन पनि सकेकी छैनन् । देवीमायाले सञ्चारकर्मी दाहाल र सहयोगी लिलबहादुरलाई कहिले नविर्सने बताइन् । घरमा वर्षभरी पुग्ने खाद्यान्न र छोरीलाई कापी कलम समेत आउँदा देवीमायाले धन्यबाद दिइन् ।

प्रकाशित मिति: शनिबार, माघ ६, २०८० २०:४५

प्रतिक्रिया दिनुहोस्