'निजी कम्पनीलाई जग्गा सुम्पिँदा खरिद ऐनमा टेक्नु पर्दैन ?'-दीपक गिरी

राजनीति

गृहपृष्ठ
राजनीति
'निजी कम्पनीलाई जग्गा सुम्पिँदा खरिद ऐनमा टेक्नु पर्दैन ?'-दीपक गिरी

'निजी कम्पनीलाई जग्गा सुम्पिँदा खरिद ऐनमा टेक्नु पर्दैन ?'-दीपक गिरी

आइतबार, माघ २८, २०८० बागेश्वरी पोस्ट

काठमाण्डौ । प्रतिनिधिसभाका सांसद एवम् नेपाली कांग्रेसका प्रभावशाली नेता दीपक गिरीले गौतम बुद्धको अस्थिधातु समाधिस्थ गरिएको नवलपरासीको रामग्राम क्षेत्रमा उत्खनन एवं बौद्ध स्तूप निर्माण गर्न निजी कम्पनीलाई जिम्मेवारी सुम्पिँदा सार्वजनिक खरिद ऐन २०६३ मा टेक्नु पर्दछ कि पर्दैन भन्ने प्रश्न गरेका छन् । सार्वजनिक लेखा समितिको आज बसेको वैठकमा बोल्दै सांसद गिरीले सार्वजनिक खरिद ऐनमै नगएर त्यसरी दिन मिल्दैन भन्ने सामान्य बुझाई पनि किन भएन भन्दै ध्यानाकर्षण गराएका छन् । उनले बिना प्रतिस्पर्धा निजी कम्पनीलाई सुम्पिने गरी भएको सम्पूर्ण प्रक्रिया रद्द गर्नुपर्ने बताए ।

"प्राइभेट कम्पनीलाई दिनु भन्दा अघि सार्वजनिक खरिद ऐन २०६३ मा जानु पथ्र्यो कि पर्दैनथ्यो," गिरीले भने-"ऐनमा टेक्ने कि नटेक्ने ? यो बडो गरुंगो किसिमले आएको हो भन्ने हामी सांसदलाई पर्दछ भने आम नागरिकलाई पर्ला कि नपर्ला ?" उनले भ्रष्टाचारलाई कसरी रोक्ने, कसरी हुन नदिने भनेर जनलहर नै सिर्जना भएको बताउँदै चाहे जनप्रतिनिधि हुन् चाहे कर्मचारी, सबै एलर्ट हुनुपर्ने आवश्यकता औंल्याए ।

यसैबीच सार्वजनिक लेखा समितिले गौतम बुद्धको अस्थिधातु समाधिस्थ गरिएको नवलपरासीको रामग्राम क्षेत्रमा उत्खनन एवं बौद्ध स्तूप निर्माण गर्न बिना प्रतिस्पर्धा निजी कम्पनीलाई सुम्पिने गरी भएका सम्पूर्ण प्रक्रिया रद्द गर्न निर्देशन दिएको छ । लुम्बिनी विकास कोषले रामग्राम क्षेत्रका स्थानीयको ११६ बिघा जग्गा अधिग्रहण हुने गरी १२० बिघा ९९ वर्षका लागि लिजमा दिने गरी समझदारी गरेको थियो । यसमा पुरातत्त्व विभाग, पर्यटन मन्त्रालय र अर्थ मन्त्रालयको लिखित असहमतिबीच कोषका उपाध्यक्ष ल्हारक्याल लामाले प्रक्रिया अघि बढाएका थिए ।

समितिको आइतबारको बैठकले उक्त सबै प्रक्रिया रद्द गर्न सरकारलाई निर्देशन दिनुका साथै निर्णय प्रक्रियामा सामेल व्यक्तिमाथि अनुसन्धान गर्न भनेको छ । समितिले यो प्रकरणमा अनुसन्धान गर्न अख्तियार दुरुपयोग अनुसन्धान आयोगलाई समेत निर्देशन दिएको छ ।

समितिले निजी कम्पनीलाई रामग्राम क्षेत्र सुम्पिने काम गैरकानूनी रुपमा भएको र जनआस्था माथिको प्रहार भएको उल्लेख गरेको छ ।

प्रकाशित मिति: आइतबार, माघ २८, २०८० २०:५७