बरगदबाबा खलिल अहमद शाह मजारको मन्त्री यादवद्वारा शिलान्यास

समाचार

गृहपृष्ठ
समाचार
बरगदबाबा खलिल अहमद शाह मजारको मन्त्री यादवद्वारा शिलान्यास

बरगदबाबा खलिल अहमद शाह मजारको मन्त्री यादवद्वारा शिलान्यास

बुधबार, फागुन २, २०८० बागेश्वरी पोस्ट

नेपालगन्ज । बाँकेको डुडुवा गाउँपालिका ३ हलबलडोलीमा निर्माण हुन लागेको बरगदबाबा खलिल अहमद शाह मजारको शिलान्यास गरिएको छ । लुम्विनी प्रदेशका कृषि तथा भूमि ब्यवस्था मन्त्री भण्डारीलाल यादवले आज एक कार्यक्रमका बीच मजारको शिलान्यास गरेका हुन् ।

बरगदबाबा मजार सौन्दर्यकरण तथा निर्माण उपभोक्ता समितिका अध्यक्ष जावेद अहमदको अध्यक्षतामा भएको शिलान्यास कार्यक्रमलाई सम्वोधन गर्दै मन्त्री यादवले यो मजारलाई पर्यटकीय क्षेत्रका रुपमा विकास गरिने बताए । उनले डुडुवा गाउँपालिकामा रहेका कमर शाह बाबा मेला धार्मिक तथा सांस्कृतिक पहिचानका रुपमा स्थापित भइसकेकाले बरगदबाबा खलिल अहमद शाहको मजारलाई पनि पर्यटकीय क्षेत्रसँग जोड्नुपर्ने धारणा राखे ।

यसको विकास र समृद्धिका लागि प्रदेश सरकारबाट हुन सक्ने सहयोगका लागि आफू प्रतिवद्ध रहेको उल्लेख गर्दै मन्त्री यादवले यसलाई व्यवस्थित बनाउन र संरक्षण गर्नका निम्ति स्थानीयबासीको भूमिका महत्वपूर्ण हुने बताए । उनले सबैको सहयोग र साथबाट यो योजनालाई पूर्णता दिनुपर्ने बताए ।यादवले मजारको पर्खाल निर्माणका लागि वजेटको ब्यवस्था गर्ने प्रतिवद्धता जनाए ।

मजार निर्माणका लागि अघिल्ला वर्षमा आएको बजेट प्राविधिक कारणले फ्रिज भएको थियो । निर्माण उपभोक्ता समितिका अध्यक्ष अहमदले मजार निर्माणका लागि बजेट व्यवस्थापन गरेकोमा कृषि मन्त्री यादवलाई धन्यवाद दिए । ८२ वर्षीय स्थानीय अब्दुल अजिज खाँले लामो समयपछि मजार निर्माण हुन थालेकोमा खुसी व्यक्त गरे । उनले मजार निर्माणपछि पर्यटन प्रबद्र्धनमा टेवा पुग्ने विश्वास व्यक्त गरे । यो मजारमा स्थानीय मात्र नभएर छिमेकी देश भारतीयहरु समेत आउने गरेका छन् । मजारमा भाकल गरे आफूले मागेको कुरा प्राप्त हुने विश्वास भएको खाँले बताए ।

प्रदेश सरकारको क्षेत्र विकास कोषको योजनामा करिब ३० लाखको लागतमा मजार निर्माण हुन लागेको हो । उपभोक्ता समितिले आगामी जेठ मसान्तसम्म मजार निर्माण सक्ने जनाएको छ । मजार शिलान्यास कार्यक्रममा डुडुवा गाउँपालिका वडा नं. ३ का अध्यक्ष अमोदकुमार तिवारी, शिक्षक मोहम्मद हुसेन खाँ, सर्वसाधारण लगायतको उपस्थिति रहेको थियो ।

प्रकाशित मिति: बुधबार, फागुन २, २०८० २१:०७

प्रतिक्रिया दिनुहोस्