कांग्रेस नेता गजेन्द्र हमालले दिए महासमिति सदस्यबाट राजीनामा

राजनीति

गृहपृष्ठ
राजनीति
कांग्रेस नेता गजेन्द्र हमालले दिए महासमिति सदस्यबाट राजीनामा

कांग्रेस नेता गजेन्द्र हमालले दिए महासमिति सदस्यबाट राजीनामा

हिन्दु राष्ट्र स्थापना गर्ने अभियानमा निरन्तर लागिरहने दृढता

आइतबार, फागुन १३, २०८० बागेश्वरी पोस्ट

नेपालगञ्ज । कांग्रेस नेता गजेन्द्र बहादुर हमालले महासमिति सदस्यबाट राजीनामा दिएका छन् । उनले आज नेपाली कांग्रेस बाँकेलाई राजीनामा बुझाएका हुन् । बाँके क्षेत्र नम्बर २ बाट महासमिति सदस्यमा निर्वाचित हमालले महासमिति बैठक सकिएको दिन राजीनामा दिने घोषणा गरेका थिए ।

फाल्गुन ७ देखि १० गतेसम्म ललितपुरमा सम्पन्न महासमिति बैठकमा हमालले सनातन हिन्दु राष्ट्रको एजेण्डलाई महासमिति बैठकमा प्रवेश गराउनुपर्ने अभियानका पक्षमा हस्ताक्षर गरेका थिए । यो अभियानका पक्षमा उनी लगायत १०४६ जना महासमिति सदस्यले हस्ताक्षर गरेर पार्टी नेतृत्वमाथि दबाब बढाएका थिए ।

हमालले हिन्दु राष्ट्रको माग राख्दै ५० प्रतिशत भन्दा बढी महासमिति सदस्यहरुले हस्ताक्षर गरी बुझाएको पत्र दर्ता मात्र गरिएको तर महासमिति बैठकमा प्रवेश नगराइएपछि आफूहरुको मागको उपेक्षा गरिएको हुँदा हिन्दु राष्ट्रको एजेण्डलाई सफल बनाउन नसकेको भन्दै नैतिकताको आधारमा महासमिति सदस्यको पदबाट राजीनामा दिएका बताएका छन् । हिन्दु राष्ट्र स्थापनार्थ सञ्चालित महाअभियानलाई सार्थक बनाउन निरन्तर लागिरहने उनको भनाई छ । "अब गाउँ गाउँ पुगेर यो अभियानलाई अगाडि बढाउँछु," राजीनामा पत्र बुझाएपछि पत्रकारहरुसंगको भेटमा उनले भने-"सनातन बैदिक धर्मलाई कमजोर बनाउने षड्यन्त्र निरन्तर भइरहेकोले म यो अभियानलाई जोडतोडले अगाडि बढाउन दृढ छु, हाम्रो संस्कार र संस्कृति जोगाउन आवश्यक छ, त्यसका लागि हिन्दु राष्ट्र अनिवार्य छ ।"

नेपाली कांग्रेस बाँकेका पूर्व सभापति रहेका हमाल पूर्व मन्त्री समेत हुन् । उनी निरन्तर हिन्दु राष्ट्रको पक्षमा छन् । उनले आफू कांग्रेस छाडेर कतै नजाने र हिन्दु राष्ट्रको पक्षमा वकालत गर्न पनि नछाड्ने दृढता व्यक्त गरे । पत्रकारहरुको जिज्ञासामा हमालले आफूले महासमिति बैठक प्रारभ्म हुँदा नै हिन्दु राष्ट्रको एजेण्डाले महामितिको बैठकमा प्रवेश नपाए राजीनामा दिने घोषणा गरेकाले नैतिकताका आधारमा राजीनमा दिएको स्पष्ट पारे ।

May be an image of blueprint, crossword puzzle and text