कृषि औजार कारखाना पुनः संचालनका लागि रकम निकासा गर्न सांसद गिरीको माग

राजनीति

गृहपृष्ठ
राजनीति
कृषि औजार कारखाना पुनः संचालनका लागि रकम निकासा गर्न सांसद गिरीको माग

कृषि औजार कारखाना पुनः संचालनका लागि रकम निकासा गर्न सांसद गिरीको माग

टरिगाउँ एयरपोर्टमा एटीआर विमान सञ्चालन गर्न मिल्ने गरी धावनमार्ग विस्तार गर्न ध्यानाकर्षण

शुक्रबार, फागुन १८, २०८० बागेश्वरी पोस्ट

काठमाडौँ । नेपाली कांग्रेसका नेता एवं सांसद दीपक गिरीले महाविर पुनको नेतृत्वमा रहेको राष्ट्रिय आविष्कार केन्द्रलाई सरकारले वाचा गरेको रकम तत्काल उपलब्ध गराउन आग्रह गरेका छन् । शुक्रबार संसदको विशेष समयमा बोल्दै गिरीले राष्ट्रिय आविष्कार केन्द्रका संस्थापक पुनले देशभर घुमेर आफ्नो जीवनीमा आधारित पुस्तक बेचेर तीन करोड रुपैयाँ संकलन गरेको बताउँदै कृषि औजार कारखानालाई पुनः संचालन गर्नका लागि सरकारले प्रतिवद्धता गरेको रकम निकासा गर्न आग्रह गरे । यसैगरी गिरीले दैनिक हजारौं युवा देश छाडेर रोजगारी वा गुणस्तरीय शिक्षाको खोजीमा विदेश गइरहेको बताउँदै उनीहरु विदेशिनुपर्ने कारण खोज्नुपर्ने बताए ।

नेपाल दुई विशाल एसियाली मुलुकहरु चीन र भारतको बीचमा रहेको बताउँदै गिरीले चीन अमेरिकापछि संसारकै दोश्रो ठूलो अर्थतन्त्रको रुपमा रहेको र पाँचौं ठूलो अर्थतन्त्र रहेको भारत ६ वर्ष भित्रमै संसारको तेश्रो ठूलो अर्थतन्त्र बन्ने अनुमान गरिएका बेला यी दुई ठूला अर्थतन्त्रको बीचमा अवस्थित नेपाल गरीब र मगन्ते रहिरहनुपर्ने कुनै कारण नभएको पनि सांसद गिरीले उल्लेख गरे । उनले नेपालको विकासमा निजी क्षेत्रको भूमिका उल्लेख्य रहेको बताउँदै निजी क्षेत्रलाई पुराना फाइल निकालेर तर्साउने काम बन्द गर्न पनि माग गरे ।

यस्तै, दंगाली जनताको भाग्य र भविष्यसँग जोडिएको टरिगाउँ एयरपोर्टमा एटीआर विमान सञ्चालन गर्न मिल्ने गरी धावनमार्ग विस्तार गर्न उनले सरकारसंग माग पनि गरे । 'केही महिना पहिले उखु किसानहरुले चिनी मिललाई बेचेको उखुको पैसा नपाएको भन्दै काठमाडौँ आउनुभएको थियो । अहिले कैयौं साता पैदलै हिँडेर मिटरब्याज पीडितहरु काठमाडौँ आउनुभएको छ । हामी संघीय प्रणालीमा गएका छौं, तर आम जनताले आफ्नो समस्या लिएर भोकै, प्यासै यो जाडोमा किन काठमाडौँ नै आउनुपर्ने ? गाउँ-गाउँमा सिंहदरबार भनेको के यही हो ? म प्रश्न गर्न चाहन्छु,’ उनले भने ।

सहकारी विभागका अनुसार अहिले नेपालमा एकतीस हजार भन्दा बढी सहकारीहरुमा झन्डै १४ लाख सदस्यले खाइ-नखाई आफूहरुले बचत गरेको रकम डुबेको गुनासो गरिरहेको बताउँदै उनले सहकारी पीडितहरुलाई न्याय दिलाउने जिम्मा पनि सरकारको रहेको बताए । उनले भने, ‘सहकारीकै कुरा गर्दा ग्यालेक्सी टीभीका अध्यक्ष रहेको जीबी राई समूहले पोखराका १८ हजार बढी बचतकर्ताको १ अर्ब ३५ करोड रकम हिनामिना गरेको निष्कर्ष पोखरा महानगरको अध्ययन समितिले निकालेको छ । पोखराको सूर्यदर्शन बचत तथा ऋण सहकारी संस्थाबाट गैरकानुनीरूपमा ऋण लिई अपचलन गरेको आरोपमा प्रहरीमा जाहेरी परेको छ  । जीबी राई समूहले करिब उनन्पचास हजार सर्वसाधारणको सात अर्ब रुपैयाँ भन्दा बढी हिनामिना गरेको प्रहरीको अनुमान छ । आम जनताको अरबौं रकम कहिले र कसरी फिर्ता हुने हो ? दोषीहरुले कहिले सजाय पाउने हुन् ? सरकारले जवाफ दिनु प-यो । जुनसुकै दलमा लागेको भए पनि, जति सुकै शक्तिशाली भए पनि सहकारीको पैसा हिनामिना गर्नेहरुलाई कडा कारवाही गर्न र पीडितहरुलाई उनीहरुको पैसा फिर्ता गराउन पनि म माग गर्दछु,' उनले भने ।