शिक्षकहरुलाई तातो हावाको लहर (लू) जोखिम सचेतना अभिमुखीकरण

समाचार

गृहपृष्ठ
समाचार
शिक्षकहरुलाई तातो हावाको लहर (लू) जोखिम सचेतना अभिमुखीकरण

शिक्षकहरुलाई तातो हावाको लहर (लू) जोखिम सचेतना अभिमुखीकरण

बिहीबार, फागुन २४, २०८० बागेश्वरी पोस्ट

नेपालगञ्ज । नेपाल रेडक्रस सोसाइटी बाँके जिल्ला शाखाको आयोजनामा तातो हावाको लहर (लू) जोखिम सचेतना विषयक विद्यालय शिक्षकहरुको लागि अभिमुखीकरण तालिम नेपालगञ्जमा सम्पन्न भएको छ । विद्यालयमा अध्ययनरत विद्यार्थीहरुलाई तातो हावाको जोखिमबाट बचाउन जनचेतना अभिबृद्धि गर्ने अभिप्रायले शिक्षकहरुलाई उक्त तालिम दिइएको हो ।

तालिममा गर्मी बढ्नुको कारण, हिटवेभ भनेको के हो ? बच्ने उपाय, जोखिममा पर्ने समुह, आगामी दिनमा गरिने कार्य लगायतका विषयमा प्रशिक्षण दिइएको छ भने विद्यालय स्तरमा सञ्चालन गरिने अभिमुखीकरणको कार्ययोजना समेत निर्माण भएको छ ।अमेरिकन रेडक्रसको सहयोग र नेपालगञ्ज उपमहानगरपालिकासंगको सहकार्यमा नेपाल रेडक्रस सोसाइटी बाँके शाखाद्वारा नेपालगञ्ज उपमहानगरपालिका क्षेत्रमा तातो हावाको लहर (लू) जोखिम व्यवस्थापन कार्यक्रम सञ्चालन भइरहेको छ ।

नेपालगञ्ज उपमहानगरपालिका वातावरण तथा विपद् व्यवस्थापन समितिका संयोजक समीर प्रताप सिंहले तातो हावाको लहरबाट हुने जोखिम कम गर्न रेडक्रसको सहकार्यमा उपमहानगरापालिका क्षेत्रमा जनचेतना अभिवृद्धि गरिरहेको बताए । नेपाल रेडक्रस सोसाइटी बाँके शाखाका सभापति गोवर्धन सिंह सम्झनाले तातो हावाको प्रभाव सबै वर्ग र समूहमा हुने गरेको र त्यसमध्ये बालबालिका, बृद्धा र दिर्घरोगी बढी प्रभावित हुने गरेको बताए ।

नेपालगञ्ज उपमहानगरपालिका शिक्षा, युवा तथा खेलकुद महाशाखाका प्रमुख गोर्खबहादुर थापा, वातावरण इन्जिनियर एवं विपद् फोकल पर्सन प्रकाश डिसी र नेरेसो बाँके शाखाका उपनिर्देशक दोलखबहादुर डाँगीले तातो हावाको लहर (लू) को बारेमा सहजीकरण गरेका थिए ।

नेपाल रेडक्रस सोसाइटी बाँके जिल्ला शाखाका सभापति सम्झनाको अध्यक्षतामा सम्पन्न कार्यक्रममा शाखा मन्त्री अजीज अहमद सिद्धिकी, कोषाध्यक्ष राकेशबहादुर श्रीवास्तव लगायत नेपालगञ्ज उपमहानगरपालिका क्षेत्रका २३ वटा सामुदायिक विद्यालयका शिक्षकहरुको सहभागिता रहेको थियो ।

प्रकाशित मिति: बिहीबार, फागुन २४, २०८० २१:१३

प्रतिक्रिया दिनुहोस्