सामी स्थानीय तह समन्वय समितिको बैठक सम्पन्न

समाचार

गृहपृष्ठ
समाचार
सामी स्थानीय तह समन्वय समितिको बैठक सम्पन्न

सामी स्थानीय तह समन्वय समितिको बैठक सम्पन्न

मंगलबार, फागुन २९, २०८० बागेश्वरी पोस्ट

नेपालगञ्ज । सुरक्षित आप्रवासन (सामी) कार्यक्रमले आज नेपालगञ्जमा स्थानीय तह समन्वय समितिको बैठक सम्पन्न गरेको छ । बाँकेमा नेपालगञ्ज उपमहानगरपालिका, कोहलपुर नगरपालिका, खजुरा गाउँपालिका र बैजनाथ गाउँपालिकामा सामी कार्यक्रम सञ्चालित छ । नेपालगञ्ज उपमहानगरपालिकाका नगर प्रमुख प्रशान्त विष्टको अध्यक्षतामा सम्पन्न बैठकमा चार वटै पालिकाका प्रतिनिधिहरुको सहभागिता थियो । बैठकमा नेपालगञ्ज उपमहानगरपालिकाका उपप्रमुख कमरुद्दिन राई, प्रमुख प्रशासकीय अधिकृत ओमबहादुर खड्का, कोहलपुर नगरापालिकाका प्रमुख प्रशासकीय अधिकृत धोलकराज ढकाल, बैजनाथ गाउँपालिकाका प्रमुख प्रशासकीय अधिकृत राजेशकुमार यादव, कोहलपुरका सामाजिक विकास समिति प्रमुख ईश्वरीप्रसाद विश्वकर्मा लगायत उपस्थित थिए ।

सामी कार्यक्रमका बाँके संयोजक कमलसिंह नेपालीले हालसम्मका उपलब्धिबारे जानकारी गराएका थिए । सामीका पञ्चराम चौधरीले सामी कार्यक्रमको प्रभाव, चुनौती र स्थानीय सरकारहरुसंगको सहकार्य तथा आगामी कार्यदिशाका विषयमा प्रस्तुतिकरण गरेका थिए ।

बैठकको समापन गर्दै नेपालगञ्ज उपमहानगरपालिकाका प्रमुख विष्टले यो कार्यक्रमले बैदेशिक रोजगारीमा जान थालेका र रोजगारीमा रहेकाहरुलाई जोखिमबाट बचाउन सहयोग पुगिरहेको बताए । उनले देशको अर्थतन्त्रको मुख्य हिस्सा बनिरहेको रेमिट्यान्स भित्राउने ठूलो मानव संशाधन अहिले देश बााहिर रहेकाले उनीहरुको सुरक्षित रोजगारीका लागि स्थानीय सरकारहरु पनि संवेदनशील रहेको बताउँदै त्यही अनुरुपको दायित्वबोध गरिरहेको बताए । बैठकको सामाजिक विकास अधिकृत कृष्णप्रसाद जोशीले सहजीकरण गरेका थिए ।

बैठकमा बैदेशिक रोजगारीमा रहेका कामदार र कामदारका परिवारको उचित संरक्षण गर्ने, गन्तब्य मुलुकमा सुरक्षित र सम्मानजनक रुपमा काम गर्न सक्ने गरी कामदारलाई सूचना, सीप, परामर्श लगायतका सहयोग प्रदान गर्ने, बैदेशिक रोजगारीमा सम्बद्ध निकायहरुको क्षमता अभिबृद्धि गरी बैदेशिक रोजगारलाई थप उपलब्धिमूलक बनाउने उद्देश्यका साथ मुलुकभरका १५६ स्थानीय तहमा सामी कार्यक्रम सञ्चालित छ ।

सामी कार्यक्रम नेपाल सरकार र स्वीस सरकारको द्विपक्षीय सम्झौता अन्तर्गत सञ्चालनमा छ । यो कार्यक्रम श्रम, रोजगार तथा सामाजिक सुरक्षा मन्त्रालय र स्थानीय सरकारको नेतृत्वमा कार्यान्वयन भइरहेको छ । कार्यक्रमलाई स्वीस सरकार विकास सहयोगको तर्फबाट हेल्भेटास नेपालले प्राविधिक सहयोग उपलब्ध गराइरहेको छ ।

प्रकाशित मिति: मंगलबार, फागुन २९, २०८० २१:३१