नेपालगञ्जमा क्षयरोगी पहिचान गर्न खोजपडताल गरिने

स्वास्थ्य

गृहपृष्ठ
स्वास्थ्य
नेपालगञ्जमा क्षयरोगी पहिचान गर्न खोजपडताल गरिने

नेपालगञ्जमा क्षयरोगी पहिचान गर्न खोजपडताल गरिने

मंगलबार, चैत २७, २०८० बागेश्वरी पोस्ट

नेपालगञ्ज । नेपालगञ्जमा क्षयरोगी पहिचान गर्न खोजपडताल गरिने भएको छ । नेपालगञ्ज उपमहानगरपालिकाले लुप्त अवस्थामा रहेका क्षयरोगीहरुको पहिचान गर्न खोजपडताल गर्ने भएको हो ।

स्वास्थ्य महाशाखा प्रमुख रामबहादुर चन्दले वडा वडामा क्षयरोगी पहिचान गर्न स्वयंसेवक खटाइने बताए । २३ वटै वडामा एक एक जना स्वयंसेवक छनौट गरेर बस्ती बस्तीमा परिचालन गरिनेछ । नेपालगञ्जलाई क्षयरोगमुक्त पालिका घोषणा गर्नका लागि जनप्रतिनिधिहरुलाई अभिमुखीकरण तथा पालिकास्तरीय समिति गठन कार्यक्रममा चन्दले यसपछि वडा वडामा वडास्तरीय समिति बनाएर क्षयरोगमुक्त घोषणा अभियान सञ्चालन गर्ने जानकारी दिए । क्षयरोग अन्त्य गर्ने लक्ष्य हासिल गर्न समुदायमा रहेका सम्भावित क्षयरोगका विरामीहरुको द्रुत पहिचान, रोकथाम, निदान र उपचारको लागि क्षयरोगमुक्त पालिका पहल कार्यक्रम सञ्चालन गरिएको छ ।

बाँकेमा ५३९ क्षयरोगी थपिएका छन् । जसमा नेपालगञ्ज उपमहानगरपालिकाका १८० जना छन् । नेपालगञ्जमा ४०४ जना क्षयरोगी रहेको अनुमान गरिए पनि १८० मात्र फेला परेका हुन् । जुन ४४ प्रतिशत मात्र हो । चन्दका अनुसार अन्य ५६ प्रतिशत विरामी खोज्न अभियान चलाउन थालिएको हो । गत बर्ष नेपालगञ्ज उपमहानगरपालिकामा ३६१ जना क्षयरोगी फेला परेका थिए । कार्यक्रममा नगर प्रमुख प्रशान्त विष्टले क्षयरोग नियन्त्रणका लागि जनचेतना र परीक्षण आवश्यक रहेको बताए । उनले नियमति औषधि सेवन गरे क्षयरोग निको हुन्छ, अन्यथा यो घातक रोग हो भन्ने बुझाई सबैमा हुनुपर्नेमा जोड दिए । कार्यक्रममा नगर उप्रमुख कमरुद्दिन राई, प्रमुख प्रशासकीय अधिकृत ओमबहादुर खड्का, वडा अध्यक्ष तथा कार्यपालिका सदस्यहरुको उपस्थिति रहेको थियो ।

नेपालबाट सन् २०५० सम्ममा क्षयरोग उन्मूलन गर्ने लक्ष्य छ भने सन् २०३५ सम्ममा क्षयरोगको महामारी अन्त्य गर्ने लक्ष्य निर्धारण गरिएको छ । नेपालमा क्षयरोगबाट हुने मृत्युदर ३ प्रतिशत रहेको छ । लुम्बिनी प्रदेशमा ३.३ र बाँकेमा २.८ प्रतिशत क्षयरोगबाट हुने मृत्युदर रहेको तथ्यांक छ ।

प्रकाशित मिति: मंगलबार, चैत २७, २०८० १७:२६