विश्व मधुमेह दिवसमा पत्रकारका लागि 'निःशुल्क स्वास्थ्य शिविर'

स्वास्थ्य

गृहपृष्ठ
स्वास्थ्य
विश्व मधुमेह दिवसमा पत्रकारका लागि 'निःशुल्क स्वास्थ्य शिविर'

विश्व मधुमेह दिवसमा पत्रकारका लागि 'निःशुल्क स्वास्थ्य शिविर'

शनिबार, कात्तिक २८, २०८३ बागेश्वरी पोस्ट

नेपालगञ्ज । विश्व मधुमेह दिवसको अवसरमा नेपालगञ्जमा पत्रकारहरुका लागि 'निःशुल्क स्वास्थ्य शिविर' गरिएको छ । नेपाल पत्रकार महासंघ बाँकेको संयोजनमा शनिबार सुपर पोलिक्लिनिक एण्ड डायग्नोस्टिक सेन्टर प्रालि वीपी चोक नेपालगञ्जमा आयोजित शिविरमा सहभागी पत्रकारहरूको मधुमेहसम्बन्धी आरबीएस (RBS) तथा एचबीएवानसी (HbA1c) परीक्षण गरिएको थियो । परीक्षणसँगै चिकित्सकबाट निःशुल्क स्वास्थ्य परामर्श समेत प्रदान गरिएको थियो ।

पत्रकारहरूको स्वास्थ्य अवस्थाबारे जानकारी लिनु, मधुमेहको जोखिम पहिचान गर्नु तथा स्वास्थ्यप्रति सचेतना अभिवृद्धि गर्नु शिविरको मुख्य उद्देश्य रहेको नेपाल पत्रकार महासंघ बाँकेले जनाएको छ । महासंघले पत्रकारहरूको स्वास्थ्यलाई प्राथमिकतामा राख्दै सुपर पोलिक्लिनिक एण्ड डायग्नोस्टिक सेन्टरसँगको सहकार्यमा शिविर सञ्चालन गरेको हो ।

नेपाल पत्रकार महासंघ बाँकेका अध्यक्ष नवीन गिरीले पत्रकारहरूले पेशागत व्यस्तता र अनियमित दिनचर्याका कारण आफ्नो स्वास्थ्यप्रति पर्याप्त ध्यान दिन नसकिरहेको अवस्थालाई मध्यनजर गर्दै शिविर आयोजना गरिएको बताए । उनले समाचार संकलन र सम्प्रेषणको जिम्मेवारीमा निरन्तर खटिने पत्रकारहरूले आफ्नो स्वास्थ्यलाई पनि उत्तिकै प्राथमिकता दिनुपर्ने उल्लेख गर्दै नियमित स्वास्थ्य परीक्षण गराउन आग्रह गरे ।

शिविर सञ्चालनमा सहयोग पुर्‍याउने व्यक्तित्व तथा सहभागी पत्रकारहरूलाई कार्यक्रममा सम्मान समेत गरिएको थियो । सम्मानित हुनेहरूमा नेपाल पत्रकार महासंघ बाँकेका अध्यक्ष गिरीसहित उपस्थित पत्रकारहरू, कन्सल्टेन्ट फिजिसियन तथा एन्डोक्राइनोलोजिस्ट डा. अल्ताबान राही, सुपर पोलिक्लिनिक एण्ड डायग्नोस्टिक सेन्टर प्रालिका अध्यक्ष शेख रियाजुल हक तथा राज मेडिसिन डिस्ट्रीब्युटर्सका सञ्चालक विनु रस्तोगी लगायत रहेका थिए ।

May be an image of one or more people and text

कार्यक्रममा सुपर पोलिक्लिनिक एण्ड डायग्नोस्टिक सेन्टर सञ्चालक समितिका पदाधिकारी, विभिन्न सञ्चारमाध्यममा कार्यरत पत्रकार तथा स्वास्थ्यकर्मीहरूको उपस्थिति रहेको थियो । कन्सल्टेन्ट फिजिसियन तथा एन्डोक्राइनोलोजिस्ट डा. राहीले मधुमेहको जोखिम बढ्दै गइरहेको उल्लेख गर्दै यसको रोकथामका लागि समयमै सचेत हुनुपर्नेमा जोड दिए । उनले सन्तुलित खानपान, नियमित शारीरिक गतिविधि, स्वस्थ जीवनशैली र समय–समयमा स्वास्थ्य परीक्षणलाई मधुमेह नियन्त्रण तथा रोकथामका महत्वपूर्ण उपायका रूपमा लिनुपर्ने बताए ।

May be an image of one or more people and text