पराजितहरुबाट भरिँदैछ राष्ट्रियसभा !

राजनीति

गृहपृष्ठ
राजनीति
पराजितहरुबाट भरिँदैछ राष्ट्रियसभा !

पराजितहरुबाट भरिँदैछ राष्ट्रियसभा !

आइतबार, फागुन ११, २०७६ बागेश्वरी पोस्ट

वामदेव गौतम र नारायणकाजी श्रेष्ठ

काठमाडौं । गोर्खा–२ बाट प्रतिनिधिसभा निर्वाचनमा पराजित नारायणकाजी श्रेष्ठलाई राष्ट्रियसभामा प्रवेश गराएपछि नेकपा अब बर्दिया–१ बाट हारेका वामदेव गौतमलाई राष्ट्रिय सभामा लैजाने तयारी भइरहेको छ ।

जसरी भए पनि प्रधानमन्त्री हुनै पर्ने रहर पालेर बसेका नेकपाका उपाध्यक्ष गौतम गएको माघ ९ मा भएको राष्ट्रियसभा निर्वाचनमा उम्मेदवार हुने अस्वीकार गरेका थिए । उनको शर्त थियो– संविधान संशोधन गरेर राष्ट्रिय सभाका सांसदहरुले पनि प्रधानमन्त्री हुन पाउने व्यवस्था भए मात्रै सांसद हुन्छु । नत्र हुँदिनँ ।’

तर एक महिना बित्न नपाउँदै उपाध्यक्ष गौतम राष्ट्रिय सभाकै सांसद युवराज खतिवडाको स्थानमा प्रवेश गर्न खोज्दैछन् । मनोनित सांसद खतिवडाको अवधि फागुन २० मा समाप्त हुँदैछ ।

प्रतिनिधिसभाको सांसद बन्ने र आफ्नै पार्टी अध्यक्ष केपी ओलीलाई विस्थापित गरेर प्रधानमन्त्री हुने चाहना बामदेव गौतमको देखिन्छ । यसअघि उनले काठमाडौं–७ का सांसद रामवीर मानन्धरलाई पदबाट लगभग राजीनामा दिन लगाइसकेका थिए ।

त्यसअघि डोल्पाका सांसद धनबहादुर बुढालाई पनि राजीनामा दिन लगाउने र उत्पन्न हुने उपनिर्वाचनबाट प्रतिनिधिसभा प्रवेश गर्ने गौतमको चाहना पूरा भएको थिएन ।

लगत्तै हेलिकोप्टर दुर्घटनामा रवीन्द्र अधिकारीको निधन भएपछि उनको कास्की–२ बाट पनि निर्वाचन लड्ने गौतमको चाहना रहेको चर्चा छ । तर जनमत गौतमतर्फ विकास नभएपछि उनी पछि हट्न बाध्य भए ।

अहिले भने उनी प्रधानमन्त्री हुने चाहना त्यागेर सांसद बन्न लागेका छन् ।

प्रकाशित मिति: आइतबार, फागुन ११, २०७६ १३:१७