भेटेरिनरी दिवसमा पशु कल्याण तथा जुनोटिक रोगसम्बन्धि अन्तरक्रिया

समाचार

गृहपृष्ठ
समाचार
भेटेरिनरी दिवसमा पशु कल्याण तथा जुनोटिक रोगसम्बन्धि अन्तरक्रिया

भेटेरिनरी दिवसमा पशु कल्याण तथा जुनोटिक रोगसम्बन्धि अन्तरक्रिया

शनिबार, वैशाख १५, २०८१ बागेश्वरी पोस्ट

नेपालगञ्ज । नेपालगञ्ज उपमहानगरपालिकाले भेटेरिनरी दिवसको अवसरमा सरोकारवालासँग पशु कल्याण तथा जुनोटिक रोगसम्बन्धि अन्तरक्रिया गोष्ठी गरेको छ । ‘पशु चिकित्सकहरु आवश्यक स्वास्थ्यकर्मी हुन्’ भन्ने नारा रहेको दिवसमा नेपालगञ्ज उपमहानगरपालिकाको पशु सेवा शाखाले सरोकारवालासँग पशु कल्याण तथा जुनोटिक रोगसम्बन्धि अन्तरक्रिया गोष्ठी गरेको हो ।

गोष्ठीमा पशु प्रजनन कार्यालय, गौघाटका पशु विकास अधिकृत डा. मिलनकुमार चौधरीले पशु कल्याण र जुनोटिक रोग सम्बन्धमा सहजीकरण गरेका थिए । नेपालमा पशु कल्याणको निर्देशिका बने पनि कानून बनेको छैन । सर्वोच्च अदालतले कानून बनाउन आदेश गरिसकेको छ । पशु कल्याणमा पशुलाई गरिने व्यवहार जोडिन्छ ।

डा. चौधरीले पशुबाट मान्छेमा र मान्छेबाट पशुमा सर्ने जुनोटिक रोगबारे जानकारी दिएका थिए । रेविज, ब्रुसेलोसिस, वर्डफ्लु लगायत रोगका बारेमा जानकारी दिइएको थियो । नेपालमा वर्षेनी तीन हजार दुई सय मान्छेलाई कुकुरले टोक्ने गर्दछ । त्यस मध्येमा दुई सय मानिसको मृत्यु हुने गरेको तथ्यांक सार्वजनिक गरिएको थियो । रेविज कुकुरसँगै न्याउरीमुसा र चमेराले टोक्दा पनि लाग्ने गर्दछ । कुनै कुकुरले मान्छेलाई टोकेको छ भने त्यो कुकुरलाई ८–१० दिन बाँधेर राखेमा रेविज लागेको कुकुर हो भने मरिहाल्ने डा. चौधरीले बताए ।

नेपालगञ्ज उपमहानगरपालिका पशु सेवा शाखाका प्रमुख लक्ष्मी शाहीले भेनेरिनरी दिवसमा सरोकारवालालाई राखेर पशु कल्याणसम्बन्धि सचेतना गराइएको बताइन् । गोष्ठीमा नेपालगञ्ज उपमहानगरपालिका–९ का अध्यक्ष गोविन्द रेग्मी, कार्यपालिका सदस्य संगिता रेग्मी, विभिन्न वडाका सदस्य, किसानको सहभागिता रहेको थियो ।

प्रकाशित मिति: शनिबार, वैशाख १५, २०८१ २१:०५

प्रतिक्रिया दिनुहोस्