नासाका बैज्ञानिक डा. जिग्लरले पहिलोपटक पश्चिम नेपालको भ्रमण गर्दै

समाचार

गृहपृष्ठ
समाचार
नासाका बैज्ञानिक डा. जिग्लरले पहिलोपटक पश्चिम नेपालको भ्रमण गर्दै

नासाका बैज्ञानिक डा. जिग्लरले पहिलोपटक पश्चिम नेपालको भ्रमण गर्दै

बिहीबार, जेठ ३, २०८१ बागेश्वरी पोस्ट

नेपालगन्ज । अमेरिकास्थित नासाका बैज्ञानिक डा. रियान जिग्लर पहिलोपटक नेपालगन्जको भ्रमणमा आउँदैछन् । उनले नासामा चन्द्रमाका उल्कापिण्ड र त्यहाँ भेटिएका काँचका टुक्राहरुको अध्ययन गरिरहेका छन् । स्काइमिस्ट प्लानेटेरियम नेपालगन्जले आयोजना गरेको पत्रकार भेटघाटमा बैज्ञानिक डा. जिग्लर नेपालगन्ज र धनगढीमा आउने र दुबै ठाउँका विभिन्न विद्यालयका छात्र-छात्राहरुमाझ कार्यक्रम गर्ने स्काइमिस्ट प्लानेटेरियमका प्रमुख निरज श्रेष्ठले बताए । उनले पहिलोपटक नासाका कुनै बैज्ञानिक पश्चिम नेपालमा आउनु बिज्ञानमा रुची राख्ने सबैका लागि सुखद खबर भएको जनाउँदै धनगढीमा जेठ ७ गते र नेपालगन्जमा जेठ ८ गते विद्यार्थिहरुसंग उहाँको प्रस्तुति राखिएको बताए ।

नेपालगन्जमा आयोजना गरिने कार्यक्रममा एक हजार ५०० देखि दुई हजारसम्म कक्षा ८, ९ र १० का बिद्यार्थीहरु सहभागी रहने जनाउँदै आयोजक संस्थाका प्रमुख श्रेष्ठले सो कार्यक्रमबाट बिज्ञानका बिद्यार्थी लगायत शिक्षकहरु पनि लाभान्वित हुने बताए । भारतका प्राय: सबैजसो ठूला सहरहरुमा सरकारले नै प्लानेटेरियमको निर्माण गरेर सञ्चालनमा ल्याएको जनाउँदै स्काइमिस्ट प्लानेटेरियमका प्रमुख श्रेष्ठले नेपालमा काठमाण्डौमा एउटा मात्र प्लानेटेरियम रहेकोमा कम्तीमा सात वटै प्रदेशमा एउटा एउटा प्लानेटेरियम सरकारले खोल्नुपर्ने बताए । उनले नेपालगन्जमा पनि प्लानेटेरियम निर्माण र सञ्चालनका लागि स्थानीय सरकारले पहल गर्नुपर्ने माग गरे ।

नेपालगन्ज आउने बैज्ञानिक जिग्लरले गत लामो समयदेखि चन्द्रमाका उल्कापिण्डहरु र अपोलो माटोमा भेटिएका काँचका टुक्राहरुका बारे अनुसन्धान गरिरहेका छन् भने सौर्यमण्डलको रहस्यबारे पनि अध्ययन गरिरहेका छन् । उनको अनुसन्धानको प्रमुख फोकस चन्द्रमा कसरी गठन भयो ? यो कसरी फरक भयो र कसरी प्रभावहरुपछि यसको सतह परिवर्तन हुन्छ भन्नेमा नै रहेको जनाइएको छ । बैज्ञानिक जिग्लरले बिराटनगरमा पनि सोही प्रकारको कार्यक्रम गर्नुका साथै अमेरिका फर्किनु अघि काठमाण्डौमा नास्टको टोलीसंग पनि छलफल र अन्तरक्रिया गर्ने कार्यक्रम रहेको छ ।

प्रकाशित मिति: बिहीबार, जेठ ३, २०८१ २१:४६

प्रतिक्रिया दिनुहोस्