नेपालगञ्जमा 'आपतकालीन कार्यसञ्चालन केन्द्रको संस्थागतीकरण' कार्यशाला चल्दै

समाचार

गृहपृष्ठ
समाचार
नेपालगञ्जमा 'आपतकालीन कार्यसञ्चालन केन्द्रको संस्थागतीकरण' कार्यशाला चल्दै

नेपालगञ्जमा 'आपतकालीन कार्यसञ्चालन केन्द्रको संस्थागतीकरण' कार्यशाला चल्दै

विपद्जन्य सूचना व्यवस्थापन प्रभावकारी बनाउन जरुरी छः मन्त्री पन्थी

बिहीबार, जेठ ३, २०८१ बागेश्वरी पोस्ट

नेपालगञ्ज । लुम्विनी प्रदेश आन्तरिक मामिला तथा कानुन मन्त्री दिनेश पन्थीले पछिल्लो समय विपद् सम्वन्धि घटनाहरु बढिरहेकाले त्यसको व्यवस्थापन तथा पूर्व तयारीका लागि नीतिगतरुपमा सुधार गर्ने बताएका छन् । नेपालगञ्जमा आजदेखि शुरु भएको ‘विपद् पूर्व तयारी र प्रतिकार्यका लागि आपतकालीन कार्यसञ्चालन केन्द्रको संस्थागतीकरण’ सम्बन्धि दुई दिने कार्याशालाको उद्घाटन गर्दै मन्त्री पन्थीले विपद् व्यवस्थापन तथा न्यूनीकरण र पूर्व तयारीका लागि सूचना व्यवस्थापन प्रभावकारी बनाउन सबैले आ–आफ्नो क्षेत्रबाट सहयोग गर्नुपर्नेमा जोड दिए ।

विपद् र सूचना व्यवस्थापन प्रभावकारी बनाउन जरुरी : मन्त्री पन्थी

मन्त्री पन्थीले प्रदेश सरकारले विपद् व्यवस्थापन सम्वन्धि बनेका ऐन तथा निर्देशिकालाई संशोधन गर्ने कार्य गरिरहेको भन्दै विपद् उद्धार खोज, राहत वितरण सम्वन्धि कार्यविधि र निर्देशिका निर्माण गरिरहेको जानकारी दिए । उनले विपद सम्वन्धि ऐन, कानून, कार्यविधिले विपद् व्यवस्थापन तथा न्यूनीकरणमा उल्लेख्य सहयोग पुर्याउने विश्वास लिए । विपद् व्यवस्थापन तथा पूर्व तयारीका लागि सूचना प्रविधि बढी प्रभावकारी हुने भएकाले त्यसको प्रयोग गरी उच्च प्रविधिको जडान तथा प्रयोगको कार्य जिल्ला तथा स्थानीयस्तरसम्म कार्यान्वयन गर्ने तयारी भइरहेको बताउँदै मन्त्री पन्थीले भने–‘त्यसका लागि जिल्ला र स्थानीय तहसंगको सहयोग र समन्वय लिइनेछ, विपद् आउनु भन्दा पहिले पूर्व तयारीका लागि हामी सबै जना सतर्क रहौं ।’

नेपालगञ्ज उपमहानगरपालिकाका प्रमुख प्रशान्त विष्टले विकास निर्माणको काम भन्दा पनि विपद् व्यवस्थापनको मुख्य कुरा भएकाले यसप्रति सबैको चासो र ध्यान जान जरुरी रहेको भन्दै विपद् पूर्व तयारीका लागि स्थानीय तहको भूमिका अझ बढाउनुपर्नेमा जोड दिए । नगर प्रमुख विष्टले नागरिकको सुरक्षाका लागि नीतिगत रुपमा नै कार्ययोजना निर्माण गरी कार्य गरिरहेको भन्दै नेपालगञ्जमा भूकम्प पूर्व तयारी परियोजनाले राम्रो अभ्यासको सुरुवात गरेको बताए । उनले विपद् सम्वन्धि विभिन्न ऐन, कार्यविधि र निर्देशिका निर्माण गरी प्रभावकारीरुपमा कार्यान्वयन गरिरहेको भन्दै पश्चिम नेपालको केन्द्रको रुपमा रहेको नेपालगञ्जमा विपद् व्यवस्थापन केन्द्र स्थापना गर्नुपर्नेमा जोड दिए ।

लुम्विनी, कर्णाली र सुदुरपश्चिम प्रदेश अन्तर्गत जिल्ला प्रशासन कार्यालयका विपद् फोकल पर्सन, विभिन्न सरोकारवाला निकायका प्रतिनिधि, सहरी विपद् तथा भूकम्पीय पूर्व तयारी परियोजना (सुपर) अन्तर्गतका कर्मचारी, विज्ञ लगायतको सहभागिता रहेको छ । दुई दिने कार्यशालामा विपद् पूर्व तयारी र प्रतिकार्यका लागि आपतकालीन कार्यसञ्चालन केन्द्रको संस्थागतका लागि विशेष छलफल गरी आवश्यक रणनीति निर्माण गरिने जनाइएको छ । लुम्विनी प्रदेश आन्तरिक मामिला तथा कानुन मन्त्रालयका विपद् शाखा प्रमुख मञ्जुकुमारी पोख्रेलको अध्यक्षतामा भएको उद्घाटन समारोहमा युएनडिपीका सुधिर कुमारले कार्यक्रमको उद्देश्यमाथि प्रकाश पारेका थिए । युरोपियन युनियनको आर्थिक सहयोग तथा युएनडिपी, युनिसेफ र युएन ओमनको साझेदारी तथा नेपाल रेडक्रस सोसाइटी बाँके शाखाको प्राविधिक सहयोगमा सञ्चालित सहरी विपद् तथा भूकम्पीय पूर्व तयारी परियोजना (सुपर) ले भूकम्पीय जोखिम न्यूनीकरणका लागि सचेतना प्रर्वद्धन गरिरहेको छ ।