रेडियो नेपाललाई सबै जनताको पहुँचमा पुर्याउनुपर्दछ: सभामुख घर्ती मगर

समाचार

गृहपृष्ठ
समाचार
रेडियो नेपाललाई सबै जनताको पहुँचमा पुर्याउनुपर्दछ: सभामुख घर्ती मगर

रेडियो नेपाललाई सबै जनताको पहुँचमा पुर्याउनुपर्दछ: सभामुख घर्ती मगर

बुधबार, जेठ ९, २०८१ बागेश्वरी पोस्ट

दाङ । लुम्बिनी प्रदेशसभाका सभामुख तुलाराम घर्ती मगरले रेडियो नेपाललाई सबै जनताको पहुँचमा पुर्‍याउनुपर्ने बताएका छन् । रेडियो प्रसार सेवा विकास समिति (रेडियो नेपाल) को आयोजनामा आजदेखि दाङको तुलसीपुरमा सुरु भएको समावेशी प्रसार सामग्री उत्पादन तथा प्रसारण प्रविधि तालिम एवम् व्यापार प्रवर्द्धन अन्तरक्रिया कार्यक्रमको उद्घाटन गर्दै सभामुख घर्ती मगरले सरकारका काम-कारबाहीलाई सहीरुपमा जनतासम्म पुर्‍याउन रेडियो नेपाल नै ग्रामीण बस्तीमा सहज हुने बताए ।

६० देखि ८० को दशकमा सूचना प्रविधिमा गुणात्मक विकास भएको उल्लेख गर्दै सभामुख घर्ती मगरले रेडियो नेपाललाई सबै घर र जनतासम्म पुर्‍याउन सरकारले नीति तथा कार्यक्रममार्फत वर्तमान सूचना प्रविधिलाई ध्यान दिनुपर्ने बताए । पछिल्लो समय सामाजिक सञ्जालले केही विकृति ल्याएको उल्लेख गर्दै उनले नियमनको आवश्यक रहेको बताए । सरकार बलियो हुनलाई सञ्चार माध्यम सशक्त हुनुपर्ने उल्लेख गर्दै सभामुख घर्ती मगरले रेडियो नेपालले आफूलाई सशक्त बनाउनुपर्ने बताए ।

कार्यक्रममा सूचना तथा सञ्चार प्रविधि मन्त्रालयका सचिव रामकृष्ण सुबेदीले १६औँ योजनामा रेडियो नेपाललाई सबै जनताको पहुँचमा पुर्‍याउने लक्ष्य राखेको बताए । रेडियो सञ्चालक समितिका अध्यक्ष समेत रहेका सचिव सुबेदीले सबै जनताको पहुँचमा रेडियो नेपाललाई पुर्‍याउन निरन्तर प्रयासमा रहेको बताए । कार्यक्रममा रेडियो नेपालका कार्यकारी निर्देशक बुद्धिबहादुर केसीले रेडियो नेपालको वर्तमान अवस्थाको बारेमा जानकारी गराएका थिए ।

उद्घाटन कार्यक्रममा तुलसीपुर उपमहानगरपालिकाका नगर प्रमुख टिकाराम खड्का, उपप्रमुख स्यानी चौधरी, नेपाली काङ्ग्रेसका जिल्ला सहसचिव राजु आचार्य, एमाले दाङका सचिव श्याम डाङ्गी, नेकपा माओवादी केन्द्रका जिल्ला इन्चार्ज निर्मल आचार्यले बोलेका थिए । कार्यक्रममा मगर खाम, अवधि र पश्चिमा थारु भाषाका कार्यपत्र प्रस्तुत गरिनेछ । मगर खाम भाषाको कार्यपत्र आजै प्रस्तुत गरिएको छ । हितबहादुर मगरले कार्यपत्र प्रस्तुत गर्नुभएको हो । कार्यपत्रमाथि टिकाराम उदासी, जय प्रकाश घर्ती मगरले टिप्पणी गरेका थिए । अवधि भाषाको भगवानदाश यादव र पश्चिमा थारु भाषाको छविलाल कोपिलाले कार्यपत्र प्रस्तुत गर्ने कार्यक्रम रहेको छ । कार्यक्रम जेठ १४ गतेसम्म संचालन हुनेछ ।

प्रकाशित मिति: बुधबार, जेठ ९, २०८१ १६:५२

प्रतिक्रिया दिनुहोस्