गणतन्त्र दिवसमा काँग्रेसको दीप प्रज्ज्वलन

राजनीति

गृहपृष्ठ
राजनीति
गणतन्त्र दिवसमा काँग्रेसको दीप प्रज्ज्वलन

गणतन्त्र दिवसमा काँग्रेसको दीप प्रज्ज्वलन

मंगलबार, जेठ १५, २०८१ बागेश्वरी पोस्ट

कोहलपुर । नेपाली काँग्रेस कोहलपुर नगर समितिले १७औं गणतन्त्र दिवसका अवसरमा आज बेलुका कोहलपुर न्यूरोडमा दीप प्रज्ज्वलन गरेको छ ।

कोहलपुर नगर सभापति वीरेन्द्र कुमार शाहको अध्यक्षतामा भएको उक्त कार्यक्रमलाई सम्वोधन गर्दै नेपाली काँग्रेस बाँकेका कार्यवाहक सभापति गोपाल प्रसाद अधिकारीले गणतन्त्र स्थापनाका लागि काँग्रेसले नेतृत्वदायी भूमिका निर्वाह गरेको स्मरण गरे । उनले मुलुकको राज्य व्यवस्था परिवर्तनका निमित्त दलहरुबीच समन्वय र सहकार्य भए जस्तै अहिलेको आवश्यकता पनि दलीय सहमति रहेको बताए । अहिले कम्युनिष्ट पार्टीहरुका कारण गणतन्त्रमाथि प्रश्न गर्नेहरुले टाउको उठाएको पनि उल्लेख गरे । राज्य व्यवस्था परिवर्तन भए पनि आम नागरिकहरुको जनजीविकाको सवालमा परिवर्तन हुन नसकेकोप्रति उनले चिन्ता व्यक्त गरे ।

काँग्रेस बाँकेका निवर्तमान पार्टी सभापति किरण कोइरालाले मुलुकको परिवर्तनका लागि नेपाली काँग्रेसले ठूलो त्याग गर्दै आएको बताइन् । २००७ सालको प्रजातन्त्र स्थापनादेखि राजतन्त्र हटाउनसम्म काँग्रेसले नेतृत्वदायी भूमिका निर्वाह गरेको उनको भनाई थियो । उनले मुलुक संकटमा रहँदा काँग्रेसले नै नेतृत्व गरेर देशलाई जोगाउने काम गरेको पनि उल्लेख गरिन् ।

पार्टीका नगर उपसभापति ऋषि सापकोटाको स्वागत मन्तव्यबाट सुरु भएको उक्त कार्यक्रमको सञ्चालन सचिव बालकृष्ण शर्माले गरेका थिए । कार्यक्रममा पार्टीका लुम्विनी प्रदेश सदस्य अञ्जना पाण्डे, काँग्रेस बाँकेका उपसभापति कृष्ण कार्की, सचिव सुधान्शु कोइराला, सहसचिव रेणुसिंह ठाकुर, जिल्ला सदस्य मनप्रसाद आचार्य, चक्र अधिकारी, काँग्रेस नेतृ संगिता सुवेदी, महासमिति सदस्य, महाधिवेशन प्रतिनिधि, प्रेस युनियन बाँकेका अध्यक्ष प्रियास्मृति ढकाल लगायत नेता कार्यकर्ताहरुको सहभागिता रहेको थियो ।

प्रकाशित मिति: मंगलबार, जेठ १५, २०८१ २१:५८