नेपालमा संघीयता कार्यान्वयन हुन सकेनः मन्त्री अहिर

राजनीति

गृहपृष्ठ
राजनीति
नेपालमा संघीयता कार्यान्वयन हुन सकेनः मन्त्री अहिर

नेपालमा संघीयता कार्यान्वयन हुन सकेनः मन्त्री अहिर

शुक्रबार, जेठ १८, २०८१ बागेश्वरी पोस्ट

नेपालगञ्ज । लुम्बिनी प्रदेशका कृषि तथा भूमी व्यवस्था मन्त्री भण्डारीलाल अहिरले नेपालमा संघीयता कार्यान्वयन हुन नसकेको बताएका छन् । आज रेडियो बागेश्वरी ९४ दशमलव ६ मेगाहर्जले आयोजना गरेको लुम्बिनी प्रदेश सरकारको आगामी बजेटमा नागरिकको अपेक्षा विषयक अन्तरक्रिया कार्यक्रमलाई सम्बोधन गर्दै मन्त्री अहिरले ठूला पार्टीका शीर्ष नेताहरुले नै नेपालमा संघीयता कार्यान्वयन गर्न नदिएको आरोप लगाए ।

संघले प्रदेशको अधिकार हस्तान्तरण नगर्दा संघीयता कागजमा मात्रै सीमित बन्न पुगेको भन्दै उनले प्रदेशले चाहेर पनि राम्रोसँग काम गर्न नसकेको बताए । प्रदेश र संघीय सरकारले समेत नीति तथा कार्यक्रममा कृषिलाई प्राथमिकता दिए पनि बजेट भने शून्य दशमलव ४ प्रतिशतको हाराहारीमा मात्रै विनियोजन गर्ने गरेकाले कृषि क्षेत्र उकासिन नसकेको उनको भनाई थियो । मन्त्री अहिरले बाँकेको समग्र क्षेत्रको विकासको लागि आफूले लडेर भए पनि कार्यक्रम र योजना ल्याउने बताउँदै रंगशाला निर्माणमा सहयोग गर्ने प्रतिवद्वता जनाए ।

कार्यक्रममा बोल्दै जिल्ला खेलकुद विकास समितिका अध्यक्ष सन्दिपजंग शाहले खेल क्षेत्रमा संघीयता लागू नै नभएको बताए । बाँकेको खेलकुद क्षेत्रको विकासमा प्रदेश सरकारले कुनै पनि किसिमको सहयोग समेत नगरेको उनको गुनासो थियो । महिला अधिकारकर्मी शाहिदा शाहले सरकारले योजना बनाउँदा र बजेट निर्माण गर्दा महिला सहभागिता नगराउने गरेको गुनासो गरेकी थिइन् ।

कार्यक्रममा जानकी गाउँपालिका–३ स्थित श्री मावी वनजारे गाउँका शिक्षक रामधीरज यादव, पत्रकार कुलेन्द्र विश्वकर्मा, युवाको तर्फबाट नितेश कुमार विश्वकर्मा लगायतले आ–आफ्नो क्षेत्रको समस्या र सरकारसँगको अपेक्षाको बारेमा मन्तव्य व्यक्त गरेका थिए । कार्यक्रम रेडियो बागेश्वरीका सञ्चालन समितिका अध्यक्ष भोजराज पाण्डेको सभाध्यक्षतामा सम्पन्न भएको थियो ।

प्रकाशित मिति: शुक्रबार, जेठ १८, २०८१ २२:१४