विपद पूर्व तयारी तथा प्रतिकार्य योजना अद्यावधिक गर्दै नेपालगन्ज उपमहानगरपालिका

समाचार

गृहपृष्ठ
समाचार
विपद पूर्व तयारी तथा प्रतिकार्य योजना अद्यावधिक गर्दै नेपालगन्ज उपमहानगरपालिका

विपद पूर्व तयारी तथा प्रतिकार्य योजना अद्यावधिक गर्दै नेपालगन्ज उपमहानगरपालिका

बिहीबार, जेठ ३१, २०८१ बागेश्वरी पोस्ट

नेपालगन्ज । नेपालगन्ज उपमहानगरपालिकाको विपद पूर्व तयारी तथा प्रतिकार्य योजना अद्यावधिक गर्न थालिएको छ । नगरमा विपद पूर्व तयारी तथा प्रतिकार्यका लागि नीतिगतरुपमा प्रभावकारी व्यवस्थापन गर्न योजना अद्यावधिक गर्न लागिएको हो ।

योजना अद्यावधिकका क्रममा आज आयोजित कार्यक्रममा उपमहानगरपालिकाका विषयगत समिति तथा शाखाका कर्मचारीहरुसंग छलफल गरिएको छ । शहरी विपद तथा भूकम्पीय पूर्व तयारी (सुपर) परियोजनाको सहयोगमा पूर्व तयारी तथा प्रतिकार्य योजना अद्यावधिक गर्न लागिएको हो । नेपालगन्ज शहरमा कुनै पनि विपद आएको बेला तत्कालको अवस्थालाई व्यवस्थापन कसरी गर्ने, त्यसका लागि पूर्व तयारी, आवश्यक व्यवस्थापन तथा तयारीको संयन्त्रलाई चुस्तदुरुस्त राख्न योजनालाई अद्यावधिक गर्न लागिएको नेपालगन्ज उपमहानगरपालिकाका विपद तथा वातावरण समितिका संयोजक समिरप्रताप सिंहले बताए । उनका अनुसार योजनालाई अद्यावधिक गर्न उपमहानगरले आवश्यक तयारी गरेको छ । उपमहानगरपालिका अन्र्तगत विभिन्न विषयगत समितिका पदाधिकारी र शाखाका कर्मचारीबीच समूहगतरुपमा छलफल गरिएको छ ।

कार्यक्रममा नगर प्रमुख प्रशान्त विष्टले विपद पूर्व तयारीका लागि नीतिगतरुपमै अघि बढेको भन्दै त्यसको लागि आवश्यक तयारी तथा बजेट व्यवस्थापन गर्ने बताए । उनले विपदको बेला नगरवासीको सुरक्षा, उद्दार, राहत, उपचार लगायतको व्यवस्था गर्ने र विपद आउनु भन्दा अघि नै पूर्व तयारीबारे सचेतना अभिबृद्धि गर्ने बताए । नेपाल रेडक्रस सोसाइटी बाँके शाखा अध्यक्ष गोबद्र्धनसिंह सम्झनाले विपद जुनसुकै समयमा आउने भएकाले त्यसको पूर्व तयारी र प्रतिकार्यका लागि चौबिसै घण्टा सचेत रहनुपर्नेमा जोड दिए ।

कार्यक्रममा विपद विज्ञ सुनिल सन शाक्यले योजना अद्यावधिकमा चाहिने सूचना, स्थानको पहिचान तथा पूर्व तयारी तथा प्रतिकार्यका लागि आवश्यक रणनीतिका विषयमा सहजीकरण गरेको आपतकालीन कार्यसञ्चालन केन्द्रका सूचना व्यवस्थापन अधिकृत रुपन ज्ञवालीले बताए । छलफलको उद्देश्यमाथि विपद तथा वातावरण शाखा प्रमुख प्रकाश डिसीले प्रकाश पारेका थिए ।

युरोपियन युनियनको आर्थिक सहयोग तथा युएनडिपी, युनिसेफ र युएन ओमनको साझेदारी तथा नेपाल रेडक्रस सोसाइटी बाँके शाखाको प्राविधिक सहयोगमा नेपालगञ्ज उपमहानगरपालिकामा सुपरले भूकम्पीय जोखिम न्यूनीकरणका लागि काम गरिरहेको छ ।

प्रकाशित मिति: बिहीबार, जेठ ३१, २०८१ १५:४८

प्रतिक्रिया दिनुहोस्