सडक निर्माण अलपत्र भएपछि भैयापुरका स्थानीय आन्दोलित

समाचार

गृहपृष्ठ
समाचार
सडक निर्माण अलपत्र भएपछि भैयापुरका स्थानीय आन्दोलित

सडक निर्माण अलपत्र भएपछि भैयापुरका स्थानीय आन्दोलित

सोमबार, असार ३, २०८१ बागेश्वरी पोस्ट

रविन्द्र घिमिरे/जानकी (बाँके) । भैयापुरका जनता सडक निर्माण अलपत्र भएपछि आन्दोलित भएका छन् । केही वर्ष अघिबाट निर्माण सुरु गरिएको सडक निर्माण तथा स्तरोन्नतिको कार्य अलपत्र हुँदा जानकी गाउँपालिका वडा नम्वर २ भैयापुरका स्थानीय आन्दोलित भएका हुन् ।

भैयापुरका स्थानीय जनताहरुले सडक अवरुद्ध गरेका छन् । उनीहरुले सडकमा अवरोध सिर्जना गरेका छन् । बाँकेको क्षेत्र नम्वर ३ अन्तर्गत पर्ने परसपुर-गौघाट सडक निर्माणको जिम्मा लिएको कन्काई गणपति जेवी काठमाण्डौं ठेकेदार कम्पनीको लापरवाहीले सडक अलपत्र परेपछि आफूहरु आन्दोलनमा उत्रिन वाध्य भएको स्थानीय केशव शर्माले बताए । पछिल्लो समय निर्माण व्यवसायी र जिम्मेवार निकाय एकअर्काको इशारामा चल्दा विकास निर्माणका कार्यमा त्यसै ब्रेक लगाउनुपर्ने अवस्था सिर्जना भएको छ । जसले गर्दा आम जनताले भने सधैंजसो सास्ती झेल्नुपर्ने भइरहेको अर्का स्थानीय विनोद सुनार गुनासो सुनाउँछन् ।

ठेकेदार पनि सम्पर्कविहिन भएको र यसमा सरकार र ठेकेदारको सेटिङ भएको हुन सक्ने स्थानीयहरु आशंका गर्छन् । अलिअलि भएको पीच बाटोलाई समेत भत्काएर अलपत्र पारेर छोडिदिएको सृजना रसाइलीको भनाई छ । सडक निर्माण शुरु नगर्दासम्म बाटो नखोल्ने चेतावनी स्थानीयले दिएका छन् । स्थानीय राज कुमार घर्ती मगरले निर्माण शुरु नभए सडक नखोल्ने बताए ।

संघीय सरकारको लगानीमा परसपुर-गौघाट सडक निर्माणको जिम्मा लिएको कन्काई गणपति जेवीले २०८१ भदौ २५ गते निर्माण सम्पन्न गर्ने गरी २०७९ बैशाख २५ गते सम्झौता गरेको थियो । तर, अहिलेसम्म पनि सडक निर्माणको काम भने अघि बढाइएको छैन । १३ करोड ४३ लाख २४ हजार ५ सय ९१ रुपैँया ६८ पैसामा सम्झौता गरेको थियो ।

प्रकाशित मिति: सोमबार, असार ३, २०८१ २०:१०

प्रतिक्रिया दिनुहोस्